ພຣະອາຈານໃຫຍ່ ມະຫາຜ່ອງ ສະມາເລີກ ເຂົ້າຮ່ວມງານສະຫລອງ 260 ປີ ສະຫຍາມນິກາຍວົງໃນສີລັງກາ

Image

ເມື່ອວັນທີ 20 ທີ່ຜ່ານມານີ້ ພຣະອາຈານໃຫຍ່ມະຫາຜ່ອງ ສະມາເລີກ,​ປະທານອົງການພຸດທະສາສນາສຳພັນລາວ ໄດ້ເປັນກຽດເຂົ້າຮ່ວມກອງປະຊຸມນານາຊາດ ທີ່ສະຖາບັນການສຶກສາພຸດທະສາສນານານາຊາດທີ່ເມືອງແຄນດີ, ປະເທດສີລັງກາ. ກອງປະຊຸມດັ່ງກ່າວໄດ້ຈັດຂື້ນໂດຍການເປັນເຈົ້າພາບຮ່ວມກັນລະຫວ່າງ ມະຫາຈຸລາລົງກອນຣາຊະວິທະຍາໄລ ແລະສະຖາບັນການສຶກສາພຸດທະສາສນານານາຊາດທີ່ສີລັງກາ.

ຈຸດປະສົງຂອງງານສຳຄັນດັ່ງກ່າວນີ້ໄດ້ຈັດຂື້ນເພື່ອ 3 ຈຸດປະສົງເປົ້າໝາຍຫລັກຄື:
1. ເພື່ອມອບຮັບໃບປະກາດແກ່ນັກສຶກສາທີ່ຮຽນຈົບຈະສະຖາບັນນີ້
2. ເພື່ອສະຫລອງຄົບຮອບ 260​ປີ ແຫ່ງສະຫຍາມນິກາຍວົງ
3. ເພື່ອຈັດກອງປະຊຸມສຳມະນານານາຊາດຂື້ນ.

ກອງປະຊຸມດັ່ງກ່າວນີ້ ໄດ້ມີຜູ້ເຂົ້າຮ່ວມຫລາຍຮ້ອຍຄົນ ແລະມີຄະນະຜູ້ແທນເຂົ້າຮ່ວມຈາກ 25 ປະເທດ. ໃນນັ້ນ ໄດ້ມີການກ່າວສູນທອນພົດ ແລະສະເໜີບົດວິໄຈຈາກນັກປາດທາງພຸດທະສາສນາຕໍ່ກອງປະຊຸມ ເຊິ່ງໃນນັ້ນ ກອງປະຊຸມກໍໄດ້ຈັດຂື້ນເປັນ 2 ວາຣະຄື:
1 .ວາຣະທີ່ເວົ້າພາສາປາລີເປັນສື່ກາງໃນການປະຊຸມ
2. ວາຣະທີ່ເວົ້າເປັນອັງກິດ ຫລືພາກພາສາອັງກິດ.

ຈຸດປະສົງຂອງກອງປະຊຸມຫລັກໆແທ້ ແມ່ນເພື່ອສະຫລອງງານບຸນຄົບຮອບ 260 ປີ ສະຫຍາມນິກາຍວົງ. ຄືເມື່ອກ່ອນນັ້ນ ທາງປະເທດສີລັງກາ ໄດ້ຕົກສູ່ກະລີຍຸກ ເກີດມີການຂ້າຟັນລັນແທງກັນ ຈາກການກໍ່ຄວາມວຸ້ນວາຍພາຍໃນ ແລະຈາກບຸກຄົນພາຍນອກຜູ້ຮູກຮານ, ພະພຸດທະສາສນາເລີ່ມເຊື່ອມໂຊມລົງທຸກຂະນະ ຈົນໃນທີ່ສຸດ ພຣະຣາຊາແຫ່ງກຸງແຄນດີ ນາມວ່າ ສຣີ ກີຣະຕິ ໄດ້ສົ່ງຣາຊະທູດໄປຍັງ ເຈົ້າຊີວິດໄທນາມວ່າ ບໍຣົມມະໂກດ ເພື່ອໃຫ້ສົ່ງຄະນະທັມມະທູດສົງ ໄທຍ໌ ໄປດຳລົງພຣະສາສນາໃນສີລັງກາ ເມື່ອປີ ຄ.ສ. 1750  ເຊິ່ງນຳໂດຍ : ມະຫາອຸປາລີ ເຖຣະ ຈິ່ງເຮັດໃຫ້ພຸດທະສາສນາຈະເລີນງອກງາມແລະພຣະສົງທີ່ບວດແລະສືບທອດໃນນິກາຍນີ້ ຈິ່ງມີຊື່ວ່າ ນິກາຍສະຫຍາມວົງ ຫລື ສະຫຍາມວັງສາ ຈົນຮອດປັດຈຸບັນ.

ສະນັ້ນ, ເຫດການດັ່ງກ່າວຈິ່ງໄດ້ຈັດຂື້ນ ເພື່ອສະຫລອງການສະຖາປະນາພຸດທະສາສນານິກາຍສະຫຍາມວົງໃນສີລັງກາ ແລະໃນກອງປະຊຸມດັ່ງກ່າວ ພຣະອາຈານໃຫຍ່ມະຫາຜ່ອງ ສະມາເລີກ, ປະທານສົງລາວຖືໄດ້ວ່າເປັນພຣະສົງທີ່ມີອາຍຸພັນສາແກ່ກວ່າໝູ່ໃນບັນດາພຣະສົງທີ່ໄດ້ນິມົນມາຈາກຕ່າງປະເທດ ແລະເພິ່ນກໍໄດ້ຮ່ວມເປັນປະທານເປີດກອງປະຊຸມແລະກ່າວສຳໂມທະນີຍະກະຖາຢ່າງຈົບງາມ.

Ekaggacitto Bhikkhu

Lao Buddhism is a website designed for Lao Buddhist Community.

Ekaggacitto Bhikkhu has 64 posts and counting. See all posts by Ekaggacitto Bhikkhu

This site uses Akismet to reduce spam. Learn how your comment data is processed.