ກອງປະຊຸມໃຫຍ່ຂອງສະມາຄົມນັກສຶກສາສົງລາວໃນໄທ

Image

Image

ກອງປະຊຸມໃຫຍ່ຂອງສະມາຄົມນັກສຶກສາສົງລາວໃນໄທ

ເມື່ອວັນທີ 30 ສິງຫາທີ່ຜ່ານມາ ທີ່ສະຖານເອກອັກຄະລັດຖະທູດລາວປະຈຳບາງກອກ ໄດ້ມີການຈັດກອງປະຊຸມໃຫຍ່ ຂອງສະມາຄົມນັກສຶກສາສົງລາວໃນໄທ ເຊິ່ງໄດ້ໃຫ້ກຽດເຂົ້າຮ່ວມໂດຍ ທ່ານຫລີ ບຸນຄ້ຳ ເອກອັກຄະລັດຖະທູດລາວຜູ້ມີອຳນາດເຕັມປະຈຳປະເທດໄທ ແລະຝ່າຍພຣະສົງກໍມີທ່ານພຣະອາຈາຣຍ໌ໃຫຍ່ ດຣ.ມະຫາເຫວດ ມະເສໄນ, ຮອງປະທານ ແລະຜູ້ປະຈຳການຫ້ອງການ ອພສ ສູນກາງ ຕະຫລອດຮອດພະນັກງານປະຈຳສະຖານທູດ ພ້ອມດ້ວຍຕົວແທນແລະປະທານນັກສຶກສາສົງລາວຈາກ ວິທະຍາເຂດຕ່າງໆຂອງ ມະຫາວິທະຍາໄລມະຫາຈຸລາລົງກອນຣາຊະວິທະຍາໄລ ຈາກຊຽງໃໝ່, ໜອງຄາຍ, ອຸບົນ, ນະຄອນພະນົມ ແລະສ່ວນກາງຄື ກຸງເທບກໍໄດ້ເຂົ້າຮ່ວມ.

ກອງປະຊຸມໄດ້ສະຫລຸບຕີລາຄາຕໍ່ຜົນສຳເລັດຂອງຄະນະບໍລິຫານງານຂອງສະມາຄົມນັກສຶກສາສົງລາວຊຸດທີ 19 ທີ່ຜ່ານມາ ໂດຍມີ ອະດີດປະທານສະມາຄົມນັກສຶກສາ ຄື ພຣະສາຍແກ້ວ ສັນຕະຈິຕໂຕ ໄດ້ຂື້ນອ່ານຜ່ານບົດສະຫລຸບ ແລະກໍໄດ້ລາຕຳແໜ່ງເພື່ອຈັດການເລືອກຕັ້ງເອົາປະທານຊຸດທີ 20 ຫລື ຊຸດໃໝ່ ເພື່ອສືບຕໍ່ດຳເນີນງານໃນປີຕໍ່ໄປ. ກອງປະຊຸມໄດ້ມີການເລືອກຕັ້ງແບບສັງຄາທິປະໄຕ(ຖືເອົາສົງເປັນສ່ວນໃຫຍ່)ເພື່ອເລືອກເອົາປະທານສະມາຄົມຊຸດໃໝ່ ເຊິ່ງໃນທີ່ສຸດກໍໄດ້ ພຣະອາຈາຣຍ໌ສົມບັດ  ສັມປັນໂນ ເປັນປະທານອົງທີ 20 ຂອງສະມາຄົມ ຫລັງຈາກນັ້ນ ກໍໄດ້ຮັບຟັງການລາຍງານຜົນສຳເລັດໃນປີຜ່ານມາຂອງຕົວແທນປະທານສະມາຄົມຈາກວິທະຍາເຂດຕ່າງໆ. ຕໍ່ມາກໍໄດ້ຮັບຟັງການໂອ້ລົມຈາກທ່ານຫລີ ບຸນຄ້ຳ ເອກອັກຄະລັດຖະທູດລາວຜູ້ມີອຳນາດເຕັມປະຈຳປະເທດໄທ ແລະຟັງການໂອ້ລົມຈາກທ່ານບຸນໄຊ ຈັນສີມາ ຮອງເອກອັກຄະລັດຖະທູດຝ່າຍສຶກສາ ແລະວັດທະນະທຳ ພ້ອມນີ້ກໍໄດ້ຮັບຟັງການລາຍງານສະພາບການສຶກສາສົງລາວຈາກທ່ານ ແກ້ວ ຈັນທະມີໄຊ ຫົວໜ້າຫ້ອງການສຶກສາສົງສູນກາງ ແລະໄດ້ຮັບຟັງໂອວາດຈາກພຣະອາຈາຣຍ໌ໃຫຍ່ ດຣ.ມະຫາເຫວດ ມະເສໄນ.

ສະມາຄົມນັກສຶກສາສົງລາວແຫ່ງປະເທດໄທ ເມື່ອກ່ອນມີຊື່ວ່າ ຊຸມນຸມນັກສຶກສາສົງລາວແຫ່ງປະເທດໄທ ເຊິ່ງໄດ້ຮັບການສ້າງຕັ້ງຂື້ນໃນປີ 1995 ໂດຍຄະນະນັກສຶກສາຮຸ່ນບຸກເບີກ ໂດຍມີ ພຣະອາຈາຣຍ໌ ເນືອງ ພິລັກໂຊຕິທອນ, ພຣະອາຈາຣຍ໌ ຊາຍຄຳ ຈຳປາອຸທຸມ(ສິກແລ້ວ), ພຣະອາຈາຣຍ໌ທະນູສອນ ຊະນະພານ(ສິກແລ້ວ), ພຣະອາຈາຣຍ໌ ບົວລາ ມະນີແສງ(ສິກແລ້ວ), ພຣະອາຈາຣຍ໌ ພູວັນ, ພຣະອາຈາຣຍ໌ມະຫາ ບຸນທະວີ ວິໄລຈັກຣ໌. ໃນຮຸ່ນທຳອິດ ຄັດເລືອກໄດ້ ພຣະອາຈາຣຍ໌ ບົວລາ ມະນີແສງ ເປັນປະທານຊຸມນຸມ. ການກໍ່ຕັ້ງຊຸມນຸມຄັ້ງທຳອິດ ແມ່ນໄດ້ຮັບການຊີ້ນຳຈາກພຣະອາຈາຣຍ໌ໃຫຍ່ ມະຫາຜ່ອງ ສະມາເລີກແລະພຣະອາຈາຣຍ໌ມະຫາບົວຄຳ ສາຣິບຸຕ ຈຸດປະສົງກໍເພື່ອເຕົ້າໂຮມຄວາມສາມັກຄີຂອງບັນດາພຣະສົງຄ໌ທີ່ເປັນນິສິດນັກສຶກສາທີ່ກຳລັງຮຽນຕໍ່ຢູ່ໃນຣາຊະນາຈັກໄທ ເພື່ອໃຫ້ການຊ່ວຍເຫລືອແລະອຳນວຍຄວາມສະດວກເຊິ່ງການແລະກັນ[1].  ເມື່ອເລີ່ມແຮກຂອງການຈັດຕັ້ງຊຸມນຸມ ກໍຍັງບໍ່ທັນຄ່ອຍມີໃຜສົນໃຈເທົ່າທີ່ຄວນ ແຕ່ເມື່ອທາງຊຸມນຸມໄດ້ຄ່ອຍໆມີບົດບາດຂື້ນມາ ເຊັ່ນ ໄດ້ມີການຊ່ວຍເຫລືອສົງເຄາະແລະຈັດກິດຈະກຳບາງຢ່າງທາງພຸດທະສາສນາ ເຊັ່ນ ການເຮັດຜ້າປ່າ, ເຮັດຜ້າກະຖິນແລະລະດົມທຶນເພື່ອຊ່ວຍເຫລືອບ້ານເກີດ ແລະເພື່ອນນິສິດດ້ວຍກັນ ບວກກັບທາງເມືອງໄທ ອະນຸຍາດໃຫ້ເຜົ່າໄທທີ່ເປັນຄົນອີສານ ຫລືຄົນລາວ ເວົ້າພາສາລາວໄດ້. ບັນດານັກສຶກສາລາວທີ່ໄປຢູ່ກ່ອນ ຕ່າງກໍພາກັນສະແດງໂຕອອກມາ ໃຜກໍວ່າຕົນເປັນລາວ ແລ້ວມາເຕົ້າໂຮມກັນເພື່ອເຂົ້າຮ່ວມເປັນສະມາຊິກຊຸມນຸມນັກສຶກສາສົງລາວ[2].

ຕະຫລອດໄລຍະຫລາຍປີຜ່ານມາ ໂດຍໄດ້ຜ່ານຂະບວນວິວັດທາງການພັດທະນາແລະປັບປຸງປ່ຽນແປງໃຫ້ເປັນຮູບປະທຳຫລາຍຂື້ນ ຈິ່ງໄດ້ພັດທະນາຈາກຊຸມນຸມກາຍມາເປັນ ສະມາຄົມນັກສຶກສາສົງລາວໃນຣາຊະນາຈັກໄທເມື່ອປີທີ່ຜ່ານມາ(2012) ແລະຍາມໃດກໍໄດ້ຮັບການຊີ້ນຳ, ອຸປະຖຳດູແລຈາກສະຖານເອກອັກຄະລັດຖະທູດລາວປະຈຳປະເທດໄທ ເພື່ອອຳນວຍຄວາມສະດວກແລະໃຫ້ຄຳປຶກສາແກ່ນັກສຶກສາສົງລາວຕະຫລອດມາ.

ຈຸດປະສົງເປົ້າໝາຍຫລັກຂອງສະມາຄົມ ແມ່ນເພື່ອເຕົ້າໂຮມຄວາມສາມັກຄີຂອງນິສິດນັກສຶກສາສົງ, ເພື່ອຊ່ວຍເຫລືອເກື້ອກູນເຊິ່ງກັນແລະກັນ, ເພື່ອເປັນຈຸດຢືນຫລັກໝັ້ນໃນການຮຽນຮູ້, ເພື່ອເຮັດໜ້າທີ່ເຜີຍແຜ່ສີລະປະແລະວັດທະນະທັມຂອງລາວ, ເພື່ອເປັນຂົວຕໍ່ໃຫ້ແກ່ອົງການຈັດຕັ້ງຂອງພັກລັດ ແລະກຳແໜ້ນແນວທາງນະໂຍບາຍຂອງພັກ ເຮັດໃຫ້ມີຈິດໃຈຮັກສາສນາ, ຮັກຊາດແລະຮັກບ້ານເກີດເມືອງນອນຂອງຕົນ ໂດຍມີສະຖານເອກອັກຄະລັດຖະທູດເປັນສູນກາງສຳຄັນໃນການໃຫ້ການດູແລ,ໃຫ້ຄຳປຶກສາແລະອຳນວຍຄວາມສະດວກຕາມຄວາມເໝາະສົມ.

ຕົກມາຮອດປີນີ້ ນັບວ່າເປັນເວລາຫລາຍປີ ທີ່ໄດ້ກໍ່ຕັ້ງມາ ຈົນໄດ້ມີການເລື່ອງຕັ້ງເອົາປະທານອົງໃໝ່ ຄືອົງທີ 20 ຂອງສະມາຄົມ ແລະລະບຽບການຄັດເລືອກນັ້ນ ແມ່ນຈະຈຳເພາະເຈາະຈົງເອົານັກສຶກສາທີ່ຢູ່ໃນຂັ້ນປີ 4 ຂອງລະບົບປະລິນຍາຕີ ແລະມີການເລືອກຕັ້ງແຕ່ລະປີ.  ເມື່ອມາຮອດມື້ນີ້ ເຮົາສາມາດເຫັນໄດ້ບົດບາດແລະການເຕີບໃຫຍ່ຂອງສະມາຄົມຢ່າງເປັນຮູບເປັນຮ່າງແລະຫວັງວ່າຈະໄດ້ມີການພັດທະນາແລະ
ຮັກສາສິ່ງທີ່ຮຸ່ນອ້າຍໄດ້ບຸກເບີກເອົາໄວ້ໃຫ້ສືບທອດຕໍ່ໄປຢ່າງສະຫງ່າງາມ.


[1] ໃຫ້ຂໍ້ມູນໂດຍ ພຣະອາຈາຣຍ໌ມະຫາ ບຸນທະວີ ວິໄລຈັກຣ໌

[2] ໃຫ້ຂໍ້ມູນໂດຍ ພຣະຄຣູເນືອງ ພິກລັກໂຊຕິທອນ

Ekaggacitto Bhikkhu

Lao Buddhism is a website designed for Lao Buddhist Community.

Ekaggacitto Bhikkhu has 64 posts and counting. See all posts by Ekaggacitto Bhikkhu

This site uses Akismet to reduce spam. Learn how your comment data is processed.