ຍາທ່ານໃຫຍ່ ຊາລີ ກັນຕະສີໂລ ອາຈານໃຫຍ່ຝ່າຍວິປັສສນາທຸຣະ ໄດ້ຈາກພວກເຮົາໄປແລ້ວ

Image

ເມື່ອທ່ຽງຄືນຂອງວັນທີ 10 ກັນຍາທີ່ຜ່ານມາ ຍາທ່ານໃຫຍ່ ດຣ. ມະຫາຊາລີ ກັນຕະສີໂລ ໄດ້ມໍຣະນະພາບທີ່ວັດປ່ານາຄູນນ້ອຍ, ເມືອງນາຊາຍທອງ, ນະຄອນຫລວງວຽງຈັນ ດ້ວຍອາການສະຫງົບ ດ້ວຍໂຣຄມະເຮັງຕັບ ລວມອາຍຸໄດ້ 81​ປີ 60 ພັນສາ.  ພຣະອາຈາຣຍ໌ໃຫຍ່ຝ່າຍວິປັສສນາທຸຣະ, ອະດີດຮອງປະທານສູນກາງອົງການພຸດທະສາສນາສຳພັນລາວ ແລະເປັນປະທານໂຄງການພຸດທະສາສນາເພື່ອການພັດທະນາ ທັງເປັນປະທານໂຄງການແປພຣະໄຕປິດົກສະບັບພາສາລາວ. ເປັນພຣະອາຈາຣຍ໌ໃຫຍ່ ສາຍວິປັດສະນາກັມມະຖານສືບສານມາຈາກພຣະອາຈາຣຍ໌ໃຫຍ່ມະຫາປານ ອານັນໂທ ທີ່ວັດພຸດທະວົງສາປ່າຫລວງໃນເມື່ອກ່ອນ.

ການຈາກໄປຂອງພຣະອາຈາຣຍ໌ໃຫຍ່ ດຣ.ມະຫາ ຊາລີ ກັນຕະສີໂລ ໃນຄັ້ງນີ້ ຖືວ່າ ຄະນະສົງລາວໄດ້ສູນເສັຍບຸກຄະລາກອນສົງ ແລະປູຊະນິຍະບຸກຄົນອົງສຳຄັນໄປ ເປັນການເສັຍເພັດເມັດງາມແຫ່ງແດນດິນລາວໄປອີກຜູ້ໜຶ່ງ. ຍາທ່ານໃຫຍ່ ເປັນຜູ້ມີຈາຣິຍະວັດອັນງົດງາມ ແລະເປັນຜູ້ອຸທິດຊີວິດເພື່ອເຜີຍແຜ່ພຣະທັມຄຳສອນໃນທາງພຣະພຸດທະສາສນາຕະຫລອດມາ ເປັນຜູ້ສືບສານປະຕິປະທາຂອງພຣະອາຈານໃຫຍ່ ມະຫາປານ ອານັນໂທ ເພື່ອວາງຮາກຖານແຫ່ງການເຜີຍແຜ່ທັມໃນດິນແດນລາວໃຫ້ແຜ່ຫລາຍ ດັ່ງທີ່ເຮົາສາມາດເຫັນໄດ້ໃນໂຄງການທີ່ຍາທ່ານໄດ້ດຳເນີນມາດັ່ງທີ່ໄດ້ກ່າວໄວ້ກ່ອນແລ້ວນັ້ນ.

ຕໍ່ມາເມື່ອວັນທີ 11 ກັນຍາທີ່ຜ່ານມາ ທາງຄະນະສົງຈາກສູນກາງແລະທ້ອງຖິ່ນ ຕະຫລອດຮອດພໍ່ແມ່ປະຊາຊົນ ຫລື ບັນດາສິດສານຸສິດ ໄດ້ພາກັນມາເຕົ້າໂຮມທີ່ວັດປ່ານາຄູນນ້ອຍ ເພື່ອປະຊຸມກະກຽມຈັດຕັ້ງຄະນະກຳມະການຮັບຜິດຊອບການບຳເພັນພຣະສົບຂອງເພິ່ນ. ກອງປະຊຸມໄດ້ມີມະຕິຕົກລົງກັນແຕ່ງຕັ້ງຄະນະຮັບຜິດຊອບງານສົບຊົ່ວຄາວ ຈົນກວ່າຈະໄດ້ມີການແຕ່ງຕັ້ງຄະນະກຳມະການຢ່າງເປັນທາງການ ຄື ຄະນະກຳມະການຮັບຜິດຊອບຈາກຂັ້ນເທິງປະສານກັນຂັ້ນທ້ອງຖິ່ນໃນຂັ້ນຕໍ່ໄປ.

ອີງຕາມມະຕິຂອງກອງປະຊຸມ ໄດ້ມີການສະເໜີໃຫ້ບັນຈຸພຣະສົບຂອງຍາທ່ານໄວ້ໃນໂກດແກ້ວ(ຫີບແກ້ວ) ແລະຈະກຳນົດການບຳເພັນກຸສົລໄປ 50 ວັນ, 100 ວັນ ຫລັງຈາກນັ້ນຈິ່ງຈະໄດ້ມີການພິຈາຣະນາກັນອີກຕື່ມວ່າ ຈະກຳນົດວັນຖວາຍພຣະເພີງສົບຂອງເພິ່ນ ຫລື ຈະມີການຮັກສາໄວ້ໃນໂກດແກ້ວ ແລະສ້າງໂຮງໄວ້ເໝືອນດັ່ງພຣະອາຈານມະຫາປານ ອານັນໂທ ດັ່ງທີ່ເຄີຍເຮັດມາໃນວັດໂສກປ່າຫລວງເມື່ອກ່ອນ. ແຕ່ກໍຍັງບໍ່ທັນມີການຕົກລົງຄັກແນ່ ແລະລໍຖ້າການອະນຸມັດແລະເຫັນດີເຫັນພ້ອມຈາກຂັ້ນເທິງ. ຕາມເຈຕະນາລົມຂອງລູກສິດຍາດໂຍມ ແມ່ນຢາກຮັກສາໄວ້ໃນໂກດແກ້ວ ເພື່ອນ້ອມຂາບໄຫວ້ສັກກາຣະບູຊາຕະຫລອດໄປ ຕາມແຕ່ອັດຕະພາບແລະການເວລາຈະອຳນວຍ.
ດັ່ງນັ້ນ, ການກຳນົດການຖວາຍພຣະເພີງສົບຂອງເພິ່ນນັ້ນ ຍັງບໍ່ທັນໄດ້ບອກໃຫ້ຮູ້ ຫລືບໍ່ອາດຈະຮັກສາໄວ້ ແລ້ວແຕ່ກໍລະນີ ຂໍໃຫ້ທ່ານຜູ້ອ່ານທັງຫລາຍຕິດຕາມຂ່າວຕໍ່ໄປ ແລະຂໍໃຫ້ສິດສານຸໄດ້ມີໂອກາດສືບຕໍ່ບຳເພັນກຸສົລເພື່ອສະແດງເຖິງຄວາມອາໄລເຖິງຄຸນງາມຄວາມດີແລະຄຳສອນ
ຂອງພຣະອາຈານໃຫຍ່ຕາມປົກກະຕິ ຈົນກວ່າຈະຮູ້ກຳໜົດການທີ່ແນ່ນອນ.

Ekaggacitto Bhikkhu

Lao Buddhism is a website designed for Lao Buddhist Community.

Ekaggacitto Bhikkhu has 64 posts and counting. See all posts by Ekaggacitto Bhikkhu

This site uses Akismet to reduce spam. Learn how your comment data is processed.