ແມ່ນແຕ່ຢູ່ຄຸກກໍບໍ່ສິ້ນອຸດົມການແລະມີສຸກໄດ້

ຄົນທີ່ມີອຸດົມການ ເຖິງແມ່ນວ່າຈະຢູ່ໃນສະພາບໃດ ຈະລຳບາກຫຼືສຸກສະບາຍ ກໍບໍ່ເລີກລົ້ມຄວາມຕັ້ງໃຈ ເປັນຜູ້ຢູ່ຢ່າງມີຄວາມຫວັງ ແລະສາມາດພັດທະນາຕົນເອງໃຫ້ປະສົບຜົນສຳເລັດໄດ້ໃນທີ່ສຸດ.

ໃນປະຫວັດສາດຜ່ານມາ ມີອະດີດຜູ້ນຳສຳຄັນລະດັບປະ ເທດແລະລະດັບສາກົນຫຼາຍທ່ານ ເຄີຍຖືກກັກຂັງຕັດອິດສະລະພາບ ແຕ່ທ່ານເຫຼົ່ານັ້ນກໍບໍ່ໄດ້ສິ້ນຫົນທາງ, ບໍ່ສິ້ນອຸດົມການແລະຄວາມຄິດອັນສູງສົ່ງ ເຊັ່ນ: ລຸງໂຮ່ຈິມິນ ຕອນທີ່ຖືກຂັງຄຸກຢູ່ ທ່ານກໍໄດ້ຂຽນບັນທຶກ, ຂຽນກະວີ ແລະມີຄວາມຫຍັງເພື່ອກອບກູ້ປະເທດຫວຽດນາມ ແລະອິນດູຈີນໃຫ້ເປັນອິດສະພາບ ຈາກພວກລ່າເມືອງຂື້ນຈັກກະພັດອາເມຣິກາ. ຢາວາຮາລານ ເນຣູ ອະດີດປະທານາທິບໍດີເປັັນເທດອິນເດຍ ກໍເຄີຍຖືກຄຸກ ແຕ່ໃນຂະນະທີ່ທ່ານຢູ່ໃນຄຸກນັ້ນ ກໍບໍ່ໄດ້ຢູ່ດາຍລ້າ, ໄດ້ຂຽນຜົນງານປະຫວັດສາດຫົວໜຶ່ງອອກມາຊື່ວ່າ: Glimpse of World History, ແລະໃນຂະນະດຽວກັນກໍໄດ້ຂຽນຈົດໝາຍຫາລູກສາວຂອງເພິ່ນຫຼາຍສະບັບເພື່ອສັ່ງສອນ, ເນື້ອໃນຈົດໝາຍລວມເອົາ ສາລະຄວາມຮູ້ມາກມາຍ ຈົນໄດ້ກາຍມາເປັນໜັງສືຜົນງານອັນສຳຄັນ ໃສ່ຊື່ວ່າ: Letters from a Father to His Daughter. ໃນສະໄໝພຸດທະການ, ມີພຣະເຈົ້າພິມພິສານຖືກລູກຊາຍຄືພຣະເຈົ້າອະຊາຕະສະຕູຂັງຄຸກ ແລະທໍລະມານ, ແຕ່ພຣະອົງໄດ້ເອົາເວລາແຫ່ງການຢູ່ຄຸກນັ້ນເພື່ອຈະເລີນສະມາທິ ຕາມຄຳສັ່ງສອນຂອງພຣະພຸດທະເຈົ້າ ຈົນສາມາດ ເຮັດໃຫ້ຈິດໃຈພົບກັບຄວາມສະຫງົບ ພົບຄວາມເມດຕາແລະໃຫ້ອະໄພບໍ່ເອົາໂທດໂກດເຄືອງແກ່ລູກທໍລະພີຂອງຕົນໄດ້.

ໃນໂລກນີ້ ຍັງມີນັກໂທດຫຼາຍຄົນໄດ້ຮັບແສງສະຫວ່າງຈາກທັມມະຄຳສັ່ງສອນຈາກພຣະສົງຊາວພຸດ ທີ່ໄດ້ທົດລອງໄປສະແດງທັມໃນຄຸກ ໂດຍສະເພາະແມ່ນທ່ານໂກເອັນກາ S.Goenka ອາຈານສອນວິປັດສະນາລູກຊອດຊາວອິນເດຍພະມ້າ ເປັນຜູ້ຈັດໂຄງການສອນວິປັດສະນາພາວະນາໃຫ້ແກ່ນັກໂທດໃນຄຸກ ຈົນໃຫ້ເກີດສະຕິ ພົບຄວາມສຸກໄດ້ ແລະເມື່ອພົ້ນໂທດແລ້ວກໍເຮັດໃຫ້ໃຊ້ຊີວິດທາງນອກເປັນປົກກະຕິດີ ບໍ່ກັບມາເຮັດຄວາມຜິດອີກ. ໃນເມືອງໄທກໍມີພຣະຫຼາຍອົງທີ່ໄປເທສະ ໜາສັ່ງສອນນັກໂທດໃນຄຸກ ເຊັ່ນ: ພຣະອາຈານ ດຣ.ອະນິລ ລະມານ ພຣະຊາວເນປານ ທີ່ມາຢູ່ໄທແຕ່ຍັງເປັນສາມະເນນໃນຄວາມອຸປະຖຳຂອງອະດີດສົມເດັດພຣະສັງຄະຣາຊ ສົມເດັດ ພຣະຍານະສັງວອນ, ເພິ່ນກໍໄດ້ສັ່ງສອນນັກໂທດເປັນປະຈຳ, ນຳພາເຂົາເຈົ້າໄຫວ້ພຣະສູດມົນແລະຈະເລີນສະມາທິ.

ສ່ວນໃນປະເທດລາວຂອງພວກເຮົາ ກໍມີໂຄງການເມດຕາທັມ, ໂຄງການທັມມະສັນຈອນ ນຳໂດຍພຣະອາຈານອະທິປະໄຕ ໄມຕີຈິດ ກໍໄດ້ດຳເນີນໂຄງການເທສະໜາສັ່ງສອນໃຫ້ກຳລັງໃຈແກ່ຜູ້ປ່ວຍໂລກເອສ ແລະພຣະອາຈານ ສີທົນ ໄຊຍະວົງສອນ ກໍໄດ້ດຳເນີນການເທສະໜາສັ່ງສອນໃຫ້ແກ່ຜູ້ທີ່ຕິດຢາເສບຕິດ ທີ່ເຂົ້າມາບຳບັດຢູ່ສູນສົມສະຫງ່າ. ການເຮັດໜ້າທີ່ສັ່ງສອນຂອງພຣະສົງ ກໍເປັນອີກແຮງໜຶ່ງທີ່ຊ່ວຍຟື້ນຟູສະຕິແລະກຳລັງໃຈແກ່ຜູ້ທີ່ກຳລັງທໍ້ໃຈໃຫ້ກັບມາດຳລົງຊີວິດຢູ່ກັບປັດຈຸບັນຢ່າງມີຄວາມສຸກໄດ້.                                ໃນເມື່ອສັງຄົມມະນຸດເຮົາ ມີຄວາມທຸກຢູ່ມາກມາຍ, ແຕ່ຖ້າເມື່ອໃດເຮົາເຂົ້າໃຈຄວາມທຸກ, ຮູ້ຈັກຍອມຮັບແລະປັບປຸງຕົນເອງ, ຝຶກຕົນເອງໃຫ້ຢູ່ກັບປັດຈຸບັນຂະນະນັ້ນໆ, ຮູ້ຈັກປ່ອຍວາງ ເຖິງແມ່ນວ່າຈະຢູ່ທ່າມກາງຄວາມທຸກ ແຕ່ໃຫ້ຝຶກໃຈໃຫ້ ເໜືອທຸກ. ຖ້າທ່ານເຂົ້າໃຈແລ້ວວ່າ: ແມ່ນແຕ່ຄົນທີ່ເຂົາຈົນຕາແຈໃນຊີວິດ, ຢູ່ໃນຄຸກ ແລະຖືກພະຍາດຮ້າຍແຮງຄຸກຄາມ ແຕ່ກໍຍັງມີຊີວິດຢູ່ຢ່າງມີຄຸນຄ່າ, ຮູ້ຈັກໄຫວ້ພຣະສູດມົນ, ຟັງທັມຄຳສັ່ງສອນ, ຝຶກຈິດໃຈຂອງຕົນໃຫ້ເບີກບານໄດ້. ແລ້ວທ່ານເດ! ພຽງແຕ່ພໍ້ບັນຫາຊີວິດໄປວັນໆສ່ຳນີ້ ຍັງຈະໂສກເສົ້າທໍ້ຖອຍໃຈອີກບໍ? ຫຼືຈະດຳລົງຊີວິດຢູ່ຕໍ່ໄປຢ່າງມີຄວາມຫວັງແລະກຳລັງໃຈ?

……

ໂດຍ: ທັມມະທາຣາ

Ekaggacitto Bhikkhu

Lao Buddhism is a website designed for Lao Buddhist Community.

Ekaggacitto Bhikkhu has 64 posts and counting. See all posts by Ekaggacitto Bhikkhu

This site uses Akismet to reduce spam. Learn how your comment data is processed.