ຜົນສຳເລັດກອງປະຊຸມໃຫຍ່ຄະນະສົງລາວໃນສະຫະຣັຖ

13418834_1037386416316737_744392431971999854_n13406849_1037386446316734_5795886126365998826_nຂໍນ້ອມຖວາຍມຸທິຕາຈິຕ ແດ່ ຍາທ່ານໃຫຍ່ບົວແກ້ວ ແສງສຸຣິຍາ
ທີ່ໄດ້ຖືກເລືອກຕັ້ງໃຫ້ເປັນ ປະທານບໍຣິຫານຄະນະສົງລາວ ໃນສະຫະຣັຖອາເມຣິກາ ຈາກການປ່ອນບັດເລືອກຕັ້ງ ໂດຍມີພຣະສົງເຂົ້າຮ່ວມກອງປະຊຸມທັງໝົດ ໔໕ ອົງ ໂດຍມີ ຍາທ່ານໃຫຍ່ບຸນມີ ກິຕຕິທັມມະວັນໂນ, ຍາທ່ານໃຫຍ່ ດຣ. ມະຫາຈັນດາພອນ ຈັກກະວະໂຣ ແລະຍາທ່ານໃຫຍ່ຄໍາຫວັນ ຕິກຂະວິໂຣ ເປັນປະມຸຂປະທານ ມີຜູ້ລົງສະມັກເລືອກຕັ້ງປະກອບດ້ວຍ ໕ ອົງ ດັ່ງນີ້
໑. ຍາທ່ານໃຫຍ່ບົວສອນ ອ່ອນສີ ໄດ້ ໗ ສຽງ
໒. ຍາທ່ານໃຫຍ່ສົມສັກ ສຸວັນນະເສນ ໄດ້ ໑໐ ສຽງ
໓. ຍາທ່ານໃຫຍ່ບົວແກ້ວ ແສງສຸຣິຍາ ໄດ້ ໒໖ ສຽງ
໔. ພຣະອາຈາຣຍ໌ດວງພະເນຕ ມິ່ງສີສຸພັນ ໄດ້ ໑ ສຽງ
໕. ພຣະພໍ່ບຸນມາ ຄຳວົງສົດ ໄດ້ ໑ ສຽງ
ຜ່ານການເລືອກຕັ້ງເອົາປະທານບໍຣິຫານຊຸດໃໝ່ ສະໄໝ ທີ ໓໔
ຄະແນນສຽງສູງສຸດແມ່ນ ຍາທ່ານໃຫຍ່ບົວແກ້ວ ແສງສຸຣິຍາ
ເຊິ່ງໄດ້ຮັບພາລະໜ້າທີ່ ໃນການບໍຣິຫານຄະນະສົງໃນສະຫະຣັຖອາເມຣິກາ
= ນະໂຍບາຍຂອງຍາທ່ານໃຫຍ່ບົວແກ້ວ ແສງສຸຣິຍາ
໑. ຈັບກັນໃຫ້ຕິດ
໒. ຄິດກັນໃຫ້ໄດ້
໓. ໃຊ້ກັນໃຫ້ເປັນ
ນະໂຍບາຍ ໓ ຂໍ້ນີ້ ຈະໄດ້ຖືກນຳໃຊ້ ເຂົ້າໃນວຽກງານການບໍຣິຫານ ເພື່ອຄວາມສາມັຄຄີ ຄວາມເສັຍສະລະ ຊ່ວຍກັນປະສານງານ ໃຊ້ຄົນໃຫ້ຖືກງານ ໃຊ້ງານໃຫ້ຖືກຄົນ ເພື່ອເຮັດໃຫ້ການບໍຣິຫານ ໃນອົງການຄະນະສົງລາວ ໃນອາເມຣິກາ ເປັນໄປດ້ວຍຄວາມຮຽບຮ້ອຍ ໄດ້ດີ. ກອງປະຊຸມໃຫຍ່ຄະນະສົງລາວ-ອາເມຣິກາ ໄດ້ປິດລົງຢ່າງເປັນທາງການ ໃນວັນສຸກ ທີ ໑໐ ເດືອນ ມິຖຸນາ ພຸທທະສັງກາສ ໒໕໕໙ ທີ່ ວັດລາວພຸທທະມຸງຄຸລ ເມືອງແອດແລນຕ້າ ຣັຖຈໍເຈັຽ.

ຊີວະປະຫວັດໂດຍຫຍໍ້:

ຍາທ່ານໃຫຍ່ມະຫາບົວແກ້ວ ຈັນທະປັນໂຍ (ແສງສຸຣິຍາ) ກໍາເນີດ ບ້ານດອນກອຍ ເມືອງ ແລະ ແຂວງຈໍາປາສັກ ປະເທດລາວ ວັນເດືອນປີເກີດ ໕ ກໍລະກົດ ໑໙໕໙  ປັດຈຸບັນ ອາຍຸ ໕໗ ປີ ໓໖ ພັນສາ.

ຊີວິດໃນວັຍເດັກ
ເຄີຍເປັນສັງຄະລີ ມາ ໕ ປີ ເຄີຍຮັບໃຊ້ຄູບາອາຈາຣຍ໌ມາແຕ່ນ້ອຍ ດ້ວຍຄວາມຮັກແລະໃກ້ຊິດ ກັບວັດວາ ພຸທທະສາສນາ ຈຶ່ງເຮັດໃຫ້ ເພີ່ນເກີດຄວາມສັທທາເຫຼື້ອມໃສ ໃນພຣະພຸທທະສາສນາ ຢ່າງແຮງກ້າ.

ບັນພະຊາເປັນສາມະເນນ:

ຕໍ່ມາຈິ່ງໄດ້ຕັດສິນໃຈບັນພະຊາ ເປັນສາມະເນນ ເມື່ອວັນທີ ໒ ກໍລະກົດ ໑໙໗໓ (ບວດເປັນຈົວ) ຕັ້ງແຕ່ ອາຍຸ ໑໓ ປີ ໂດຍມີ ຍາຄູປານ ເປັນພຣະອຸປັດຊາ ໃນເວລານັ້ນ.

ອຸປະສົມບົທ
ບວດເປັນພຣະພິກຂຸ ໑໓ ກັນຍາ ໑໙໗໙ ທີ່ ພັທທະສີມາ ວັດບ້ານໜອງຜຳ ເມືອງແລະແຂວງຈຳປາສັກ ມີພຣະກັມມະວາຈາຂວາ ຄື ພຣະອາຈາຣຍ໌ແຊ້ມ ແລະພຣະກັມມະວາຈາຊ້າຍ ຄື ພຣະອາຈາຣຍ໌ຄຳໃບ

ການສຶກສາ່

ໃນປີ ໑໙໘໕ ຍາທ່ານໃຫຍ່ ບົວແກ້ວ ແສງສຸຣິຍາ ໄດ້ຍ້າຍຂຶ້ນມາສຶກສາ ທີ່ ນະຄອນຫຼວງວຽງຈັນທຣ໌ ພຳນັກຢູ່ ວັດຫາຍໂສກວີຫາຣ ຈົນສຳເຣັຈການສຶກສາ ຈາກ ມະຫາວິທະຍາລັຍແຫ່ງຊາດລາວ ສາຂາພູມສາດ ຄະນະສັງຄົມສາດ

ປະສົບການແລະຜົນງານ

ພຣະອາຈາຣຍ໌ໃຫຍ່ບົວແກ້ວ ແສງສຸຣິຍາ ເມື່ອຄາວຢູ່ປະເທດລາວ ເພິ່ນເຄີຍເປັນເຈົ້າອາວາດວັດຫາຍໂສກ, ເມືອງຈັນທະບຸລີ, ນະຄອນຫລວງວຽງຈັນ, ເຄີຍເປັນຄະນະປະຈຳ ອ.ພ.ສ.ສູນກາງອົງການພຸດທະສາສນາສຳພັນລາວ, ເປັນຮອງຫົວໜ້າສຶກສາສົງສູນກາງ, ເປັນຮອງຜູ້ອຳນວຍການແລະເປັນອາຈານສອນທີ່ວິທະຍາໄລສົງອົງຕື້ເມື່ອປີ ໑໙໘໙,
ເປັນອາຈາຣຍ໌ສອນໂຮງຮຽນພຣະປະຣິຍັຕຕິທັມ ວັດໜອງຜຳ ແຂວງຈຳປາສັກ ມີສ່ວນຮ່ວມກັບຂະບວນສະໂມສອນນັກຂຽນໜຸ່ມແຕ່ປີ ໑໙໘໕ ແລະເປັນໜຶ່ງໃນຄະນະກຳມະການກໍ່ຕັ້ງສະມາຄົມນັກປະພັນລາວ ແລະຜູ້ກໍ່ຕັ້ງວາລະສານວັນນະສິນ ມີບົດບາດສຳຄັນໃນວົງການວັນນະກຳລາວ ມີຜົນງານການຂຽນເລື່ອງສັ້ນທີ່ມີຊື່ວ່າ: ໂມທະນາຮັກ.  ແລະຜົນງານກະວີພໍສົມຄວນແຕ່ປີ ໑໙໙໐ ຈົນຮອດວັນທີ ໑໓ ສິງຫາ ໒໐໐໔ ເພິ່ນຈິ່ງໄດ້ ເດີນທາງໄປປະຕິບັດສາສນະກິດ ເຜີຍແຜ່ຫລັກທັມຄຳສອນຂອງພຣະພຸດທະເຈົ້າຢູ່ສະຫະຣັຖອາເມຣິກາ ຕາມຄຳນິມົນຂອງອອກຕົນຍາດໂຍມຜູ້ມີສັດທາເຫຼື້ອມໃສໃຫ້ໄປເຜີຍແຜ່ທັມ.

ຜົນງານດ້ານກະວີດີເດັ່ນ
ເປັນສະມາຊິກ ໜັງສືພິມ ວາລະສານ ວັນນະສິນ
ເປັນສະມາຊິກຊາວໜຸ່ມລາວ
ເປັນເຈົ້າຂອງ ບົດກະວີເລື່ອງສັ້ນ ໂມທະນາຮັກ
ດັ່ງບົດກະວີຂອງ ຍາທ່ານໃຫຍ່ມະຫາບົວແກ້ວ ຈັນທະປັນໂຍ ຕອນໜຶ່ງວ່າ:
ສຸຂຢູ່ບ້ານເພິ່ນພຸ້ນ      ອຸດົມຫຼາກເຫຼືອຫຼາຍ
ຫາໄປປຸນປານສຸຂ          ຮ່ວມເຮືອນຮຽມແທ້
ສຸຂບໍ່ປຸນແປງປີ້ນ          ໃຈດຽວເດັດດ່ຽວ
ສຸຂກົມກຽວກໍ່ສ້າງ         ເມືອງບ້ານໃຫ້ຮູ່ງເຮືອງ =
ຫຼັງຈາກຍາທ່ານໃຫຍ່ໄດ້ສຶກສາແລະຜ່ານການສິດສອນ ມາຫຼາຍບ່ອນ ຈົນເປັນທີ່ເຄົາຣົບເຫຼື້ອມໃສ ແກ່ສັທທາຍາດໂຍມ ຈາກຕ່າງປະເທດ ຕົກມາ ວັນທີ໑໓  ສິງຫາ ໒໐໐໔ ຍາທ່ານ ໄດ້ເດີນທາງມາປະຕິບັດສາສນະກິຈ ເຜີຍແຜ່ທັມຄຳສອນ ຂອງອົງສົມເດັດພຣະສັມມາສັມພຸທທະເຈົ້າ ທີ່ ປະເທດສະຫະຣັຖອາເມຣິກາ ຈົນເຖີງປັຈຈຸບັນນີ້ ປັຈຈຸບັນ ພຳນັກຢູ່ ວັດພຸທທະພາວະນາ ເມືອງແວສເຟິສ ຣັຖແມັດຊາຊູແຊດ ສະຫະຣັຖອມາເມຣິກາ ເປັນຜູ້ອຳນວຍການໂຮງຮຽນສອນສີລທັມ ວັດພຸທທະພາວະນາ ພາກຣະດູຮ້ອນ ປະຈຳວັດ ຈັດຣາຍການສຽງທັມສ່ອງໃຈ ທາງສະຖານີວິທະຍຸ ໙໑.໕ FM. MA. USA. ທຸກໆ ວັນຈັນ ເວລາ ໑໑:໐໐ – ໑໒:໐໐ ນ.

ຂໍ້ມູນຈາກ:
Manotham Kindhearted US ແລະ ທັມມະທາຣາ
ເພຈ: ໂຄສົກປະຈຳອົງກາຣສົງລາວ ອາເມຣິກາ ພະແນກປະຊາສັມພັນ

13407144_1037386466316732_5335982066075352384_n

Ekaggacitto Bhikkhu

Lao Buddhism is a website designed for Lao Buddhist Community.

Ekaggacitto Bhikkhu has 64 posts and counting. See all posts by Ekaggacitto Bhikkhu

This site uses Akismet to reduce spam. Learn how your comment data is processed.