ພຣະທາດຊາຍ: ຕຳນານປະເພນີແລະຄຸນຄ່າ

1397393043-DSC00480Cu-o

ພຣະທາດຊາຍ: ຕຳນານປະເພນີແລະຄຸນຄ່າ

ຮຽບຮຽງໂດຍ: ວາໂຍ

ພຣະທາດຊາຍ ຫລື ເຈດີຊາຍ ໝາຍເຖິງກອງຊາຍທີ່ກໍ່ຂຶ້ນມາເຮັດເປັນລັກສະນະທາດ ໃນຮູບຊົງທີ່ໃຫຍ່ ຫລື ນ້ອຍຕາມຄວາມເໝາະສົມຂອງຜູ້ທີ່ກໍ່ຂຶ້ນມາຈາກດິນຊາຍທີ່ບໍລິສຸດ. ຫລັງຈາກນັ້ນ ກໍມີທຸງຜ້າແພສີຕ່າງໆ ທີ່ຕັດເປັນສ້ອຍ ນ້ອຍໆ ເໜັບໃສ່ໄມ້ເປັນດິ້ວ ແລ້ວປັກເທິງພຣະທາດ ເພື່ອປະດັບໃຫ້ຈົບງາມ. ການກໍ່ພຣະທາດຊາຍ ເປັນປະເພນີທີ່ເຮັດສືບກັນມາຍາວນານ ຈົນບໍ່ຮູ້ວ່າເກີດຂຶ້ນມາແຕ່ປາງໃດ ແລະມັກມີໃນຍາມບຸນປີໃໝ່ ໂດຍສະເພາະແມ່ນມື້ສຸດທ້າຍ ຊາວບ້ານຈະພາກັນໄປເຕົ້າໂຮມຢູ່ວັດ ໃຫ້ພຣະສົງສູດມຸງຄຸນ ຫລັງຈາກນັ້ນກໍຈະມີການສາມັກຄີກັນກໍ່ທາດຊາຍຂຶ້ນ ຫລືບາງຄົນກໍເຮັດໃນນາມສ່ວນຕົວແລະຄອບຄົວ.

ອີງຕາມຕຳນານຄວາມເປັນມາ ຈຸດປະສົງຂອງການກໍ່ເຈດີຊາຍ ແມ່ນເພື່ອນ້ອມຖວາຍບູຊາພຣະຣັຕຕະນະໄຕຣ. ນອກຈາກນີ້ແລ້ວ ເມື່ອຕົກມາຮອດຍຸກປັດຈຸບັນ ການສ້າງເຈດີຊາຍ ຖືວ່າມີຜົນປະໂຫຍດອັນໃຫຍ່ຫລວງຄື: ພຣະທາດຊາຍທີ່ຍາດໂຍມສ້າງຂຶ້ນນັ້ນ ສາມາດນຳໄປໃຊ້ປະໂຫຍດໃນການກໍ່ສ້າງຖາວອນວັດຖຸ ເຊັ່ນກຸຕິວິຫານ, ສາລາໂຮງທັມ ແລະສິມໄດ້. ສະນັ້ນ, ການເຮັດເຈດີຊາຍໃນຍຸກປັດຈຸບັນ ຈິ່ງໄດ້ຜົນສອງຕໍ່ ຄື:ໄດ້ບູຊາພຣະຣັຕຕະນະໄຕຣ ແລະໄດ້ປະກອບສ່ວນເຂົ້າໃນການກໍ່ສ້າງວັດວາສາດສະໜາອີກດ້ວຍ.

ພຣະທາດຊາຍ ມີຕຳນານ ແລະຄວາມເປັນມາດັ່ງນີ້ຄື:

“ເມື່ອຄາວພຣະພຸດທະອົງປະທັບຢູ່ບຸບພາຣາມມະຫາວິຫາຣ ໃນນະຄອນສາວັດຖີ ໃນຊົງສະແດງທັມມະເທສນາເຖິງອານິສົງສ໌ ກໍ່ເຈດີຊາຍ ແລ້ວຕັ້ງຄວາມປາຖນາໄວ້ ເປັນໃຈຄວາມວ່າ: ວັນໜຶ່ງເປັນລະດູຮ້ອນ ອາກາດຮ້ອນອົບເອົ້າຫລາຍ, ພຣະເຈົ້າປັດເສນທິໂກສົລ ຊົງພັກຜ່ອນພຣະອິຣິຍາບົດໃຫ້ສະບາຍ ທີ່ຫາດຊາຍຮິມແມ່ນ້ຳ ບໍ່ຫ່າງຈາກພຣະນະຄອນເທົ່າໃດ ໄດ້ຊົງທອດພຣະເນດເຫັນຊາຍສະອາດຂາວງາມດີ ມີດຳຣິວ່າ ຄວນເຮັດເປັນຮູບເຈດີຂຶ້ນ ເພື່ອບູຊາພຣະຣັຕຕະນະໄຕຣ ດີກວ່າທີ່ເຮົາຈະມາເດີນຫລີ້ນໃຫ້ເສຍປະໂຫຍດລ້າໆ ເມື່ອຊົງດຳຣິເຊັ່ນນັ້ນແລ້ວ ກໍຮີບລົງມື້ ກໍ່ເປັນຮູບເຈດີຊາຍດ້ວຍພຣະອົງເອງ. ພວກບໍລິວານທັງຫລາຍທີ່ຕາມສະເດັດ ກໍລົງມືກໍ່ເຊັ່ນກັນ ເມື່ອສຳເລັດແລ້ວ ແນມເບິ່ງກໍເປັນທິວແຖວສວຍງາມຍິ່ງໜັກໜາ ກໍສະເດັດກັບມາສູ່ບຸບພາຣາມມະຫາວິຫາຣ ອະພິວາດ ແລ້ວນັ່ງຢູ່ທີ່ສົມຄວນສ່ວນຂ້າງໜຶ່ງ ແລ້ວຂາບທູນເຖິງອານິສົງສ໌ ການກໍ່ພຣະເຈດີຊາຍ ບູຊາພຣະຣັຕຕະນະໄຕຣ ທີ່ພຣະອົງໄດ້ຊົງກະທຳມາໂດຍຕະຫລອດ.

ພຣະພຸດທະອົງຊົງໂປດປະທານພຣະທັມມະເທສນາວ່າ ມະຫາຣາຊະ ດູລາມະຫາບໍພິດ! ນໍຣະຊົນຍິງຊາຍທັງຫລາຍເຫລົ່າໃດ ມີສັດທາເຫລື້ອມໃສ ອຸດສາຫະພະຍາຍາມພາກພຽນ ກໍ່ສ້າງເຈດີຊາຍໃຫຍ່ນ້ອຍ ກໍດີ ມີຈຳນວນ 8 ໝື່ນ 4 ພັນອົງນັ້ນ ຫລືວ່າຈະຫລາຍນ້ອຍພຽງໃດກໍຕາມ ດ້ວຍສັດທາອັນແຮງກ້າ ກໍຈະບໍ່ໄປສູ່ອະບາຍຕະຫລອດຮ້ອຍຊາດ ຖ້າເກີດເປັນມະນຸດ ກໍຈະເປັນຜູ້ມັ່ງຄັ້ງດ້ວຍຊັບສົມບັດ ພ້ອມດ້ວຍບໍລິວານເປັນອັນມາກ ຄັນເມື່ອຕາຍຈາກມະນຸດໂລກ ກໍຈະໄປເກີດໃນສະຫວັນ ສະເຫວີຍທິບສົມບັດ ແມ່ນແຕ່ຕະຖາຄົດກໍເຄີຍໄດ້ກະທຳມາແລ້ວໃນຄັ້ງພຣະໂພທິສັດ ບຳເພັນປາຣະຢູ່ແລ້ວ ພຣະອົງຈິ່ງໄດ້ນຳອະດີດນິທານມາສະເໜີດັ່ງນີ້:

ຄັ້ງນັ້ນ ພຣະຕະຖາຄົດ ໄດ້ເກີດໃນຕະກູນອະນາຖະ ພໍຈະເລີນໄວຂຶ້ນມາ ກໍຕ້ອງເຂົ້າປ່າສະແຫວງຫາຟືນມາຂາຍລ້ຽງຊີບ ປະຕິບັດຢູ່ແບບນີ້ເປັນອາຈິນ ຢູ່ມາວັນໜຶ່ງໄດ້ເຫັນຊາຍຂາວສະອາດ ບໍລິສຸດຜຸດຜ່ອງ ໃນຮາວປ່າ ກໍມີຈິດໃຈຜ່ອງໃສສັດທາ ໃຄ່ຈະກໍ່ພຣະເຈດີ ບູຊາພຣະຣັຕຕະນະໄຕຣ ຈິ່ງສະລະເວລາ ບໍ່ຕັດຟືນໝົດມື້ ໄດ້ກໍ່ພຣະທາດເຈດີຊາຍສຳເລັດແລ້ວ ໄດ້ຈີກຜ້າຫົ່ມຜືນໜຶ່ງປັກເປັນທຸງໄຊ ແລ້ວບູຊາພຣະຣັຕຕະນະໄຕຣ ໃນພຸດທະບາດຂອງພຣະຕິສສະສັມມາສັມພຸດທະເຈົ້າ ແລ້ວຕັ້ງຄວາມປາຖນາວ່າ ຂໍໃຫ້ຂ້າພະເຈົ້າໄດ້ສຳເລັດໂພທິຍານ ໃນອະນາຄົດຕະການນັ້ນເທີ້ນ. ຄັນເມື່ອທຳລາຍຂັນແລ້ວ ໄປເກີດຢູ່ຊັ້ນດາວະດິງ ມີວິມານສູງ 12 ໂຍຊນ໌ ສະເຫວີຍທິພຍ໌ສົມບັດຢູ່ 2 ພັນປີທິພຍ໌ ເມື່ອສິ້ນອາຍຸໄຂຍ໌ແລ້ວ ໄດ້ຈຸຕິເກີດເປັນພຣະຣາຊໂອຣົສຂອງພຣະເຈົ້າພາຣານະສີ ໄດ້ທ່ອງທ່ຽວຢູ່ໃນໂລກມະນຸດ ບຳເພັນປາຣະມີຍານຈົນເຕັມປ່ຽມດີແລ້ວ ຈິ່ງໄດ້ມາອຸບັດເປັນຕະຖາຄົຕ ດັ່ງທີ່ມະຫາບໍພິຕປາຣົບຢູ່ຂະນະນີ້ ເມື່ອຈົບພຣະທັມມະເທສນາແລ້ວ ພຣະເຈົ້າປັດເສນທິໂກສົນ  ພ້ອມດ້ວຍບໍລິວານທັງຫລາຍ ກໍມີຄວາມຍິນດີໂສມະນັສ ໃນການທີ່ພຣະອົງຊົງກໍ່ພຣະເຈດີຊາຍ ບູຊາຄຸນພຣະຣັຕຕະນະໄຕຣໂດຍບໍ່ເປົ່າປະໂຫຍດ”[1].

ດັ່ງນັ້ນ ການກໍ່ພຣະທາດຊາຍໃນລະດູການປີໃໝ່ ຫລືລະດູການໃດກໍຕາມ ຖືວ່າເປັນປະເພນີອັນດີງາມ ແລະມີຄຸນຄ່າທາງພຸດທະສາສນາ. ເພື່ອເປັນການປະກອບສ່ວນເຂົ້າໃນການສ້າງສາພັດທະນາວັດວາສາສນາ ຈິ່ງສົມຄວນໄດ້ຮັບການອະນຸລັກຮັກສາໄວ້ໃຫ້ຄຽງຄູ່ກັບສັງຄົມຊາວພຸດເຮົາໃຫ້ຍາວນານ.

___________________________________________________________

[1] http://www.84000.org/anisong/17.html

Advertisements

ຕອບກັບ

Please log in using one of these methods to post your comment:

WordPress.com Logo

You are commenting using your WordPress.com account. Log Out /  ປ່ຽນ )

Google+ photo

You are commenting using your Google+ account. Log Out /  ປ່ຽນ )

Twitter picture

You are commenting using your Twitter account. Log Out /  ປ່ຽນ )

Facebook photo

You are commenting using your Facebook account. Log Out /  ປ່ຽນ )

w

Connecting to %s