ງານບຸນເຂົ້າກັມປະຈຳປີ ທີ່ວັດຈອມເພັດ ເມືອງປາກເຊ

948C93BC-64FE-49DE-B2B4-047688BAABCD.jpegວັດຈອມເພັດ ເປັນວັດທີ່ມີຄວາມສຳຄັນທາງພຸດທະສາສນາອີກວັດໜຶ່ງ ໃນປະເທດລາວ ເວົ້າສະເພາະຢູ່ໃນເຂດບ້ານດອນເຂາະ, ເມືອງປາກເຊ,ແຂວງຈຳປາສັກ ມີເນື້ອທີ່ປະມານ 23 ເຮັກຕາ.  ວັດແຫ່ງນີ້ເປັນທີ່ປະດິດສະຖານພຣະເຈົ້າໃຫຍ່ອົງຫລວງ ທີ່ມີລວງສູງນັບແຕ່ຖານຂຶ້ນໄປ 30 ແມັດ, ໜ້າຕັກ 27 ແມັດ, ປາງມາຣະວິໄຊ(ປາງຊະນະມານ) ພາຍໃຕ້ການນຳພາກໍ່ສ້າງໂດຍ ພຣະອາຈານໃຫຍ່ ມະຫາສຸວັນ ຈັນທະລາດ, ປະທານ ອພສ ແຂວງຈຳປາສັກ ແລະເຈົ້າອະທິການວັດພ້ອມດ້ວຍເຖົ້າແກ່ແນວໂຮມວັດຈອມເພັດ, ໃຊ້ເວລາໃນການກໍ່ສ້າງ 2 ປີ 6 ເດືອນ ກັບ 26 ວັນ ເມື່ອປີ ພ.ສ 2549- ພ.ສ. 2552, ສິ້ນມູນຄ່າການກໍ່ສ້າງທັງໝົດ 1,664, 226, 300 ກີບ. ວັດແຫ່ງນີ້ ກໍເປັນອີກວັດໜຶ່ງທີ່ເໝາະສຳຫລັບການທັດສະນາຈອນຂອງນັກທ່ອງທ່ຽວທັງພາຍໃນແລະຕ່າງປະເທດ.

C5C28444-1C55-4987-828C-B4E51CEFCEDD.jpeg

ໃນປີນີ້ ກໍເປັນປີທີ 28 ຂອງການຈັດງານບຸນປະຣິວາສະກັມປະຈຳປີ ຕາມຮີດຄອງປະເພນີລາວ ເຊິ່ງໄດ້ຮັບການສືບທອດລິເລີ່ມມາແຕ່ປີ 1991 ເປັນຕົ້ນມາ ໂດຍພາຍໃຕ້ການນຳພາຂອງພຣະຄຣູພາວະນາພິລົມ ໂສມສີ ແກ້ວຂຽວ ອະດີດປະທານ ອພສ ແຂວງຈຳປາສັກ ໄດ້ນຳພາພຣະພິກຂຸສົງ ສາມະເນນ ພ້ອມດ້ວຍອຸບາສົກ-ອຸບາສິກາ ດຳເນີນມາຈົນເຖິງປັດຈຸບັນ. ປີນີ້ ໄດ້ມີການເລີ່ມຕົ້ນເຮັດບຸນເຂົ້າກັມຕັ້ງແຕ່ວັນທີ 24 ພະຈິກ ເຖິງວັນທີ 3 ທັນວານີ້ ໂດຍມີ ພຣະອາຈານໃຫຍ່ມະຫາສຸວັນ ຈັນທະລາດ ເປັນປະທານເຂົ້າຮ່ວມເປີດງານ, ມີພຣະສົງເຂົ້າຮ່ວມຈຳນວນ 231 ອົງ, ພຣະ 72 ອົງ, ສາມະເນນ 159 ອົງ, ມີພຣະລູກກັມ 14 ອົງ.

ຈຸດປະສົງຂອງການຈັດງານບຸນເຂົ້າກັມ ແມ່ນເພື່ອສົ່ງເສີມຮີດຄອງປະເພນີລາວ ຕາມຮີດ 12 ທີ່ເຄີຍປະຕິບັດສືບກັນມາແຕ່ບູຮານນະການ ເພື່ອສຶກສາພຣະທັມວິໄນ ແລະປະຕິບັດວິປັດສະນາກັມມະຖານ ເຊິ່ງເປັນຫົວໃຈຫລັກສຳຄັນຂອງພຸດທະສາສນາ.

ງານບຸນດັ່ງກ່າວຈະໄດ້ດຳເນີນໄປເປັນເວລາ 9 ວັນ ແລະຫລັງຈາກສີ້ນສຸດລົງກໍຈະສືບຕໍ່ມີງານສົມໂພດພຣະພຸດທະຮູບ ເພື່ອປະດິດສະຖານໄວ້ໃນວັດແຫ່ງນີ້.

 

 

 

Ekaggacitto Bhikkhu

Lao Buddhism is a website designed for Lao Buddhist Community.

Ekaggacitto Bhikkhu has 64 posts and counting. See all posts by Ekaggacitto Bhikkhu

This site uses Akismet to reduce spam. Learn how your comment data is processed.