ພິທີເປີດວິທະຍາໄລສຸທັມມະນິມິດຢ່າງເປັນທາງການ

ໃນວັນທີ 14 ສິງຫາ 2018 ນີ້ ໄດ້ມີການເປີດນຳໃຊ້ອາຄານວິທະຍາໄລສຸທັມມະນິມິດ ເຊິ່ງເປັນວິທະຍາໄລສົງແຫ່ງໃໝ່ຂຶ້ນທີ່ ວັດເທບນິມິດ(ທາດຝຸ່ນ), ເມືອງຈັນທະບຸລີ, ນະຄອນຫຼວງວຽງຈັນ ໂດຍມີແຂກເຂົ້າຮ່ວມທັງເປັນຝ່າຍສົງແລະຄາຣະວາດຈຳນວນ 82 ອົງ/ທ່ານ ໂດຍພາຍໃຕ້ການເປັນປະທານຂອງ ພຣະອາຈານໃຫຍ່ ມະຫາງອນ ດຳຣົງບຸນ, ປະທານສູນກາງອົງການພຸດທະສາສນາສຳພັນລາວ ແລະພາຍນອກມີພະນະທ່ານລັດຖະມົນຕີ ກະຊວງສຶກສາທິການ ພ້ອມດ້ວຍເຖົ້າແກ່ແນວໂຮມ ພໍ່ແມ່ປະຊາຊົນກໍໄດ້ເຂົ້າຮ່ວມ.

ວິທະຍາໄລສຸທັມມະນິມິດ ເປັນວິທະຍາໄລສົງແຫ່ງທີສາມໃນປະເທດລາວ, ເຊິ່ງແຫ່ງທີໜຶ່ງແມ່ນຢູ່ວັດອົງຕື້ມະຫາວິຫານ, ແຫ່ງທີສອງຢູ່ວັດຫຼວງປາກເຊ. ວິທະຍາໄລສຸທັມມະນິມິດ ມີເນື້ອທີ່ປະມານ 6,000 ຕາແມັດ, ເປັນອາຄານຮຽນ 3 ຊັ້ນ ປະກອບດ້ວຍ 12 ຫ້ອງຮຽນ. ມີ 1 ຫ້ອງປະຊຸມໃຫຍ່, 20 ຫ້ອງນຳ້, 1 ຫ້ອງປະຊຸມນ້ອຍ, 6 ຫ້ອງການ, 5 ຫ້ອງເກັບເຄື່ອງ, 1 ຫ້ອງອາຫານ ແລະ 1 ຫ້ອງສະໝຸດ. ການກໍ່ສ້າງໄດ້ໃຊ້ເວລາ 20 ເດືອນ ສ້າງສຳເລັດໃນວັນທີ 30 ພຶດສະພາ 2017.

ການກໍ່ສ້າງອາຄານຮຽນ ວິທະຍາໄລສຸທັມມະນິມິດແຫ່ງນີ້ ແມ່ນເພື່ອຕອບສະໜອງຕາມຄວາມຮຽກຮ້ອງຕ້ອງການຂອງການພັດທະນາການສຶກສາສົງໃນໄລຍະໃໝ່ ເພື່ອໃຫ້ມີຄຸນນະພາບແລະປະລິມານ ຕາມແຜນນະໂຍບາຍຂອງອົງການພຸດທະສາສນາສຳພັນລາວ, ກະຊວງສຶກສາທິການແລະກິລາ ແລະສອດຄ່ອງກັບແນວທາງນະໂຍບາຍຂອງພັກແລະລັດຖະບານ.
ການກໍ່ສ້າງອາຄານຮຽນດັ່ງກ່າວນີ້ ແມ່ນເກີດຂຶ້ນຈາກການຊ່ວຍເຫຼືອຂອງທ່ານ ປາສະການ ໂກເຢ ເຊິ່ງເປັນນັກທຸລະກິດຊາວຝຣັ່ງ ທີ່ເປັນລູກສິດຂອງຍາທ່ານໃຫຍ່ ມະຫາປຣີຊາ ສຸທັມມະໂກສານ, ອະດີດທີ່ປຶກສາສູນກາງ ອ.ພ.ສ ເປັນພຣະສົງລາວທີ່ມີບົດບາດສຳຄັນອົງໜຶ່ງໃນວົງການຄະນະສົງລາວໃນໄລຍະຜ່ານມາ.
ປັດຈຸບັນ ເຖິງແມ່ນວ່າ ຈະໄດ້ມີການເປີດພິທີນຳໃຊ້ອາຄານຮຽນຂຶ້ນຢ່າງເປັນທາງການແລ້ວກໍຕາມ ແຕ່ລະບົບການຮຽນການສອນຍັງຢູ່ໃນຂັ້ນຕອນກະກຽມບຸກຄະລາກອນແລະພັດທະນາຫຼັກສູດ ເພື່ອຮັບຮອງໂດຍກະຊວງສຶກສາທິການ.
39165056_1778293308958498_4369824014714011648_n
ການເກີດຂຶ້ນຂອງວິທະຍາໄລສຸທັມມະນິມິດ ຖືວ່າເປັນນິມິດໝາຍອັນດີຕໍ່ວົງການຄະນະສົງລາວ ໂດຍສະເພາະແມ່ນແວດວົງການສຶກສາສົງ ເພື່ອຈະໄດ້ມີການພັດທະນາແລະປັບປຸງລະດັບການສຶກສາຂອງພຣະສົງລາວ ໃຫ້ມີຄວາມກ້າວໜ້າ ຄຽງຄູ່ກັບບັນດາວົງການສຶກສາສົງໃນປະເທດອ້ອມຂ້າງແລະໃນລະດັບສາກົນ ຈຸດປະສົງກໍເພື່ອເຮັດໃຫ້ພຣະສົງມີຄວາມຮູ້ທາງດ້ານພຸດທະສາສນາແລະທາງໂລກ ເພື່ອໃຫ້ກາຍເປັນຊັບພະຍາກອນບຸກຄົນທີ່ມີຄຸນນະພາບທາງດ້ານການເຜີຍແຜ່ພຸດທະສາສນາແລະເພື່ອຮັບໃຊ້ປະເທດ ຊາດບ້ານເມືອງ ໃຫ້ຈະເລີນຮຸ່ງເຮືອງ ຄຽງຄູ່ກັບນະໂຍບາຍການພັດທະນາການສຶກສາແລະສ້າງສາພັດທະນາ ປະເທດຊາດຂອງພັກແລະລັດຖະບານໃນຊຸມປີຕໍ່ ໜ້າແລະຍາວນານ.

ຂ່າວໂດຍ: ທັມມະທາຣາ
ພາບແລະຂໍ້ມູນໂດຍ: ກະບີ່ດຽວດາຍ

Ekaggacitto Bhikkhu

Lao Buddhism is a website designed for Lao Buddhist Community.

Ekaggacitto Bhikkhu has 90 posts and counting. See all posts by Ekaggacitto Bhikkhu

2 thoughts on “ພິທີເປີດວິທະຍາໄລສຸທັມມະນິມິດຢ່າງເປັນທາງການ

This site uses Akismet to reduce spam. Learn how your comment data is processed.