ກອງປະຊຸມນານາຊາດເພື່ອພັດທະນາສັກກາຍະພາບພຣະນັກເຜີຍແຜ່ຄັ້ງທີ 6

 

ໃນລະຫວ່າງວັນທີ 27-30 ສິງຫາ 2018 ນີ້, ມະຫາວິທະຍາໄລມະຫາມຸງກຸດຣາຊະວິທະຍາໄລ ວິທະຍາເຂດຂອນແກ່ນ ໄດ້ຈັດກອງປະຊຸມນານາຊາດເພື່ອພັດທະນາສັກກາຍະພາບພຣະນັກເຜີຍແຜ່ລຸ່ມແມ່ນ້ຳຂອງຄັ້ງທີ 6 ຂຶ້ນ. ໃນການປະຊຸມຄັ້ງນີ້ ໄດ້ມີພຣະສົງນັກເຜີຍແຜ່, ນັກວິຊາການ ທີ່ເຮັດວຽກຕົວຈິງ ຈາກ 6 ປະເທດຄື: ລາວ, ໄທ, ຫວຽດນາມ, ພະມ້າ, ຈີນ, ກຳປູເຈຍ ເຂົ້າຮ່ວມເປັນຈຳນວນ 60 ອົງ/ທ່ານ ແລະລວມທັງຜູ້ເຂົ້າຮ່ວມຈາກນັກສຶກສາແລະນັກວິຊາການພາຍໃນໄທອີກປະມານ 500 ອົງ/ຄົນ. ທາງຄະນະຜູ້ແທນລາວທີ່ໄດ້ເຂົ້າຮ່ວມໃນຄັ້ງນີ້ ມີທາງຄະນະສົງຈາກສູນກາງອົງການພຸດທະສາສນາສຳພັນລາວ ໂດຍມີ ຍາທ່ານໃຫຍ່ ປອ.ມະຫາເຫວດ ມະເສໄນ, ຮອງປະທານສູນກາງອົງການພຸດທະສາສນາສຳພັນລາວ, ຫົວໜ້າຊີ້ນຳວຽກງານເຜີຍແຜ່ສີລະທັມແລະວິປັດສະນາກັມມະຖານ, ພຣະສົງທີ່ເປັນຄູອາຈານແລະນັກເຜີຍແຜ່ຈາກ 3 ແຂວງຄື ຈຳປາສັກ, ວຽງຈັນ ແລະຫຼວງພຣະບາງ, ຮອງກົມສາສນາແນວຈາກແນວລາວສ້າງຊາດ ພ້ອມດ້ວຍນັກຂ່າວຈາກໂທລະພາບແຫ່ງຊາດແລະຜູ້ຊົງຄຸນນະວຸດ.

40353217_2130503323856952_994038883232514048_n

ຈຸດປະສົງຂອງກອງປະຊຸມ ແມ່ນເພື່ອແລກປ່ຽນບົດຮຽນຈາກບັນດາພຣະສົງທີ່ເປັນນັກເຜີຍແຜ່ຈາກ 6 ປະເທດ ທີ່ໄດ້ຜ່ານການປະຕິບັດການເຮັດວຽກໃນວົງການເຜີຍແຜ່ພຸດທະສາສນາຕົວຈິງທີ່ຜ່ານມາ ເຊິ່ງຖືໄດ້ວ່າເປັນບົດຮຽນອັນສຳຄັນ ເພື່ອແລກປ່ຽນຮຽນຮູ້ ຖອດຖອນບົດຮຽນເຊິ່ງກັນແລະກັນ ເພື່ອນຳໄປປະຍຸກໃຊ້ໃນການເຜີຍແຜ່ໃນໂອກາດຕໍ່ໄປ ແລະທາງມະຫາວິທະຍາໄລ ຖືເອົາໂອກາດປະຊຸມນີ້ ເປັນການວາງສະແດງແລະນຳສະເໜີຜົນງານທາງວິຊາການ ຈາກການຂຽນບົດວິທະຍານິພົນ, ດຸດສະດີນິພົນ ຂອງນັກສຶກສາທີ່ກຳລັງສຶກສາທີ່ມະຫາວິທະຍາໄລໃຫ້ແກ່ຄະນະຜູ້ແທນທີ່ເຂົ້າຮ່ວມປະຊຸມໄດ້ຊົມ ຖືວ່າ ເປັນການຍິງປືນນັດດຽວໄດ້ນົກສອງສາມໂຕ.

40361831_293138914831486_7924372930664857600_n

ໃນກອງປະຊຸມ ຈະມີນັກວິຊາການທີ່ເປັນຜູ້ປາຖະກະຖາຫຼັກ ເພື່ອຖວາຍແລະແບ່ງປັນຄວາມຮູ້ໃຫ້ແກ່ສຳມະນາກອນທີ່ເປັນພຣະນັກເຜີຍແຜ່, ຄູອາຈານ ແລະນັກສຶກສາໃນລະດັບມະຫາວິທະຍາໄລ. ປີນີ້ໄດ້ມີວາລະການປະຊຸມກ່ຽວກັບການພັດທະນາວິຊາການງານວິໄຈລະດັບຊາດ ເນັ້ນໃສ່ແນວທາງການຮ່ວມມື, ການຈັດການກ່ຽວກັບການສຶກສາ ແລະການເຜີຍແຜ່ພຸດທະສາສນາ ຫຼັງຈາກນັ້ນ ໄດ້ແບ່ງກຸ່ມນຳສະ      ເໜີຜົນງານນິທັດສະການທາງວິຊາການອອກເປັນແຕ່ລະຫົວຂໍ້ຍ່ອຍເຊັ່ນ: 1.ກຸ່ມທາງການສຶກສາ, 2. ກຸ່ມມະນຸດສາດ,ສັງຄົມສາດແລະກຸ່ມວັດທະນະທຳ, 3. ກຸ່ມພຣະພຸດທະສາສນາ ແລະປຣັຊຍາ, 4. ກຸ່ມການເຜີຍແຜ່ພຸດທະສາສນາ ໂດຍພຣະນັກເຜີຍແຜ່ພຸດທະສາສນາລຸ່ມແມ່ນ້ຳຂອງ.

40418502_291382128114315_5650077873579491328_n

ບັນຍາກາດໃນກອງປະຊຸມ ເຕັມໄປດ້ວຍຄວາມອົບອຸ່ນ, ມີຄວາມໝາຍ ແລະໄດ້ຮຽນຮູ້ຈາກປະສົບການແລະບົດຮຽນອັນລ້ຳຄ່າເຊິ່ງກັນແລະກັນ. ຍິ່ງໄປກວ່ານັ້ນແມ່ນເຕັມໄປດ້ວຍໄມຕີຈິດມິດຕະພາບອັນດີງາມ ແບບບ້ານພີ່ເມືອງນ້ອງ ເຊິ່ງມັນໄດ້ສະແດງອອກໃນການຕ້ອນຮັບດ້ວຍໄມຕີຈິດອັນອົບອຸ່ນ ຕາມແບບປະເພນີຄົນອີສານ ລາວແລະໄທ, ມີການຂາບໄຫວ້ກັນແບບສະແດງເຖິງວິຖີແຫ່ງພຸດທະສາສນາ, ທັດສະນະສຶກສາຢ້ຽມວັດວາອາຮາມ, ປະກອບດ້ວຍມີການສະແດງສີລະປະແລະວັດທະນະທຳອັນເປັນເອກະລັກຂອງອີສານທີ່ມີວັດທະນະທຳຄືກັນກັບຝັ່ງລາວ ເພື່ອເປັນການສົ່ງເສີມແລະອະນຸລັກສີລະປະວັດທະນະທຳໄປພ້ອມກັນ.

40196827_1057853871043909_2547877266885443584_n

ມະຫາມະກຸດຣາຊະວິທະຍາໄລ ວິທະຍາເຂດຂອນແກ່ນ ເປັນມະຫາວິທະຍາໄລທາງພຸດທະສາສນາທີ່ເປີດກວ້າງການສຶກສາທັງແກ່ພຣະສົງແລະຄາລະວາດຈາກພາຍໃນແລະຕ່າງປະເທດ ແຕ່ລະປີມີນັກສຶກສາເຂົ້າຮ່ຳຮຽນຫລາຍພໍສົມຄວນ ມີການພັດທະນາວິທະຍາເຂດມາຢ່າງຕໍ່ເນື່ອງ ທີ່ສຳຄັນແມ່ນໄດ້ສະແດງບົດບາດທາງການຈັດການປະຊຸມນານາຊາດມາແລ້ວເປັນເວລາ 6 ປີຊ້ອນ ແລະຍັງຈະສືບຕໍ່ເລື້ອຍໄປ ເພື່ອສືບສານໄມຕີຂອງນານາປະເທດເຂດລຸ່ມແມ່ນ້ຳຂອງ ເພື່ອວຽກງານເຜີຍແຜ່ພຸດທະສາສນາໃຫ້ຍືນຍົງ ນຳຄວາມສັນຕິສຸກມາສູ່ປວງຊົນ.

40168618_462120824270801_4483207461951504384_n

 

Ekaggacitto Bhikkhu

Lao Buddhism is a website designed for Lao Buddhist Community.

Ekaggacitto Bhikkhu has 64 posts and counting. See all posts by Ekaggacitto Bhikkhu

This site uses Akismet to reduce spam. Learn how your comment data is processed.