ມະຫາວິທະຍາໄລ PBMU ຢ້ຽມຢາມວິທະຍາໄລສົງລາວທັງສອງແຫ່ງ

ເມື່ອວັນທີ 30 ສິງຫາ 2018 ນີ້ ວິທະຍາໄລສົງອົງຕື້ ໄດ້ຕ້ອນຮັບຄະນະຜູ້ບໍລິຫານ ຄູອາຈານຈາກມະຫາວິທະຍາໄລທັມມະທູດພຸດທະສາສນາພັນຕະພິນ Pantapwinttaung Buddhist Missionary University(PBMU) ຈາກສະຫະພາບມຽນມ້າ ໃນຕອນບ່າຍ ທີ່ຫ້ອງປະຊຸມວິທະຍາໄລສົງອົງຕື້, ວັດອົງຕື້ມະຫາວິຫານ, ນະຄອນຫຼວງວຽງຈັນ. ຈຸດປະສົງໃນການຢ້ຽມຢາມຂອງຄະນະຜູ້ແທນ ຄູອາຈານຈາກມະຫາວິທະຍາໄລ(PBMU) ຄັ້ງນີ້ ແມ່ນເພື່ອເດີນທາງມາສ້າງສຳພັນທະໄມຕີ, ການຮ່ວມມືກັນທາງດ້ານການສຶກສາທາງພຸດທະສາສນາແລະວັດທະນະທຳທີ່ກ່ຽວຂ້ອງກັບພຣະພຸດທະສາສນາ, ເພື່ອຮັດແໜ້ນສາຍພົວພັນລະຫວ່າງພຣະສົງທັງສອງຝ່າຍ ເວົ້າສະເພາະແມ່ນວິທະຍາໄລສົງອົງຕື້.

ກອງປະຊຸມຕ້ອນຮັບຄະນະຄູອາຈານໄດ້ດຳເນີນໄປດ້ວຍບັນຍາກາດຢື້ຢາມຖາມຂ່າວທີ່ອົບອຸ່ນ ແລະມີຄວາມໝາຍສຳຄັນ, ຄະນະຜູ້ແທນໄດ້ຮັບຟັງການລາຍງານສະພາບການສຶກສາຮ່ຳຮຽນໃນວິທະຍາໄລສົງອົງຕື້ ແລະໄດ້ແລກປ່ຽນບົດຮຽນຮ່ວມກັນ. ທາງວິທະຍາໄລສົງອົງຕື້ນຳໂດຍ ພຣະອາຈານ ປອ.ພວງປະເສີດ ພູມາວົງ, ຜູ້ອຳນວຍການ ພ້ອມດ້ວຍຄູອາຈານ ແລະທາງຝ່າຍມະຫາວິທະຍາໄລ (PBMU) ນຳໂດຍ ພຣະອາຈານ ປອ.ຈິນຕະລັງກາລະ, ນາຍົກສະພາມະຫາວິທະຍາໄລ, ພຣະອາຈານ ປອ.ປັນນະສາຣະ, ອະທິການບໍດີມະຫາວິທະຍາໄລ ພ້ອມດ້ວຍຄູອາຈານທີ່ເດີນທາງມາຮ່ວມ.

ກອງປະຊຸມໄດ້ຈົບລົງດ້ວຍການເຊັນຮັບຮອງບົດບັນທຶກຄວາມເຂົ້າໃຈໃນການຮ່ວມມືທາງດ້ານພຸດທະສາສນາແລະ ວັດທະນະທຳ ດັ່ງມີເນື້ອໃນຕໍ່ໄປນີ້:

① ສະຖາບັນການສຶກສາດ່ັງຕໍ່ໄປນີ້, ເຊິ່ງເປັນສະຖານທີ່ພຣະພຸດທະສາສນາໄດ້ມີການສິດສອນແລະສົ່ງເສີມໃຫ້ເປັນວິຊາຮຽນ, ຈະເປັນສະຖາບັນຮ່ວມກັນລົງນາມພາຍໃຕ້ບົດບັນທຶກຄວາມເຂົ້າໃຈສະບັບນີ້;

ໃນລາວ:

➊ ວິທະຍາໄລສົງອົງຕື້, ວຽງຈັນ, ປະເທດລາວ

ໃນພະມ້າ

❷ ມະຫາວິທະຍາໄລທັມມະທູດພຸດທະສາສນາ (PBMU)
Takkyi, Yangon, Mynmar
Tel: +959-5039330,+959-49714285
Email: pantapwinbmc2017@gmail.com
aungyint.mynmar@gmail.com

● ການສຶກສາກ່ຽວກັບພຸດທະສາສນາ ແລະວິຊາຮຽນທີ່ກ່ຽວຂ້ອງ

②ເພື່ອເປັນການລະບຸແລະກຽມພ້ອມຖານຂໍ້ມູນກ່ຽວກັບການສຶກສາທາງພຣະພຸດທະສາສນາລະຫວ່າງສອງຝ່າຍ ເຊິ່ງລະບຸແຈ້ງນັກສຶກສາແລະນັກປາດທາງພຸດທະສາສນາ ເພື່ອມີໂຄງການແລກປ່ຽນຮ່ວມກັນທັງສອງຝ່າຍ.
③ ເພື່ອແລກປ່ຽນນັກຮຽນແລະນາຍຄູ ເພື່ອສຶກສາທາງພຸດທະສາສນາ ລະຫວ່າງທັງສອງຝ່າຍ ໂດຍສະເພາະແມ່ນໃນພຣະພຸດທະສາສນາແລະວິຊາທີ່ກ່ຽວຂ້ອງ.
④ ເພື່ອແລກປ່ຽນພຣະສົງທີ່ເປັນພະຫູສູດແລະນັກປາດທາງພຸດທະສາສນາລະຫວ່າງສອງຝ່າຍ
⑤ ທັງສອງຝ່າຍຄວນມີການຮ່ວມມືກັນ ເພື່ອອະນຸລັກ ແລະສົ່ງເສີມຄຳສອນຂອງພຣະພຸດທະເຈົ້າ ແລະຄຳສອນທີ່ກ່ຽວຂ້ອງທັງໃນຮູບແບບທີ່ເປັນປຶ້ມຕຳຣາ ແລະແບບອີເລັກໂທຣນິກໃນແຜ່ນ ຊີດີຣອມ
⑥ ມີການລວບລວມແລະພິມເຜີຍແຜ່ຄຳສັບທາງພຣະພຸດທະສາສນາໃນພາສາຂອງສອງຝ່າຍ
⑦ ມີການແປແລະແລກປ່ຽນສື່ສິ່ງພິມທີ່ເປັນຄຳສອນຂອງພຣະພຸດທະເຈົ້າ(ພຣະໄຕຣປິດົກ) ແລະສິ່ງພິມອື່ນໆທີ່ກ່ຽວຂ້ອງກັບພຸດທະສາສນາໃນພະມ້າ ແລະໃນພາສາຂອງປະເທດທີ່ກ່ຽວຂ້ອງທັງສອງຝ່າຍ.
⑧ ຈັດກອງປະຊຸມແລະສຳມະນາຕ່າງໆ ທີ່ກ່ຽວຂ້ອງກັບຮູບແບບແລະວັດທະນະທຳທາງພຸດທະສາສນາທັງສອງຝ່າຍ.

  • ທາງດ້ານວັດທະນະທຳ

⑨ ຈັດໃຫ້ມີໂຄງການອະນຸລັກແລະປົກປັກຮັກສາຄຳພີເກົ່າແກ່ ລະຫວ່າງທັງສອງຝ່າຍ
⑩ ຈັດຕັ້ງໃຫ້ມີທະນາຄານຂໍ້ມູນເພື່ອສະໜອງຂໍ້ມູນຂ່າວສານກ່ຽວກັບພຣະພຸດທະສາສນາທີ່ມີຢູ່ໃນສອງປະເທດ ເຊິ່ງກ່ຽວກັບສີລະປະແລະຂະໜົບທຳນຽມທາງພຸດທະສາສນາ
⑪ ແລກປ່ຽນທາງດ້ານສີລະປະປະຕິມາກຳຮູບປັ້ນ, ຈາລຶກ ແລະຄວາມຮູ້ລະຫວ່າງທັງສອງຝ່າຍ
⑫ ຮ່ວມກັນຈັດວາງສະແດງສີລະປະແລະສະຖາປະຕິມາກຳ, ຮູບປັ້ນ, ວັນນະຄະດີແລະສິ່ງອື່ນໆທາງພຸດທະສາສນາ ເພື່ອສະແດງໃຫ້ເຫັນເຖິງການພັດທະນາທາງພຸດທະສາສນາລະຫວ່າງທັງສອງຝ່າຍ.

ສຳເລັດການເຊັນບັນທຶກທີ່ວຽງຈັນ, ປະເທດລາວ, ໃນວັນທີ 30 ສິງຫາ 2018 ເຊິ່ງໃນເອກະສານເປັນພາສາອັງກິດທັງສອງຕົ້ນສະບັບ.

ແລະໃນມື້ຕໍ່ມາຄືວັນທີ 31 ສິງຫາ 2018, ທາງຄະນະຜູ້ບໍລິຫານ ພ້ອມດ້ວຍຄູອາຈານ ວິທະຍາໄລສົງຈຳປາສັກ ທີ່ວັດຫຼວງປາກເຊ, ເມືອງປາກເຊ ກໍໄດ້ຕ້ອນຮັບຄະນະຜູ້ແທນຄູອາຈານຈາກ(PBMU)  ໃນຄະນະດຽວກັນ ເພື່ອຈຸດປະສົງການຮ່ວມມືແລະເຊັນບົດບັນທຶກຄວາມເຂົ້າໃຈໃນຂັ້ນຕໍ່ໄປ.

40429624_1879168405485882_6183361177922306048_n

ໃນໄລຍະຜ່ານມາ ຖືໄດ້ວ່າ ມະຫາວິທະຍາໄລ(PBMU) ເປັນຜູ້ເປີດກວ້າງເດີນທາງໄປຍັງບັນດາປະເທດທີ່ນັບຖື ພຣະພຸດທະສາສນາແລະມີສະຖາບັນການສຶກສາຂັ້ນສູງ ເພື່ອສານສຳພັນການຮ່ວມມືທາງການສຶກສາມາແລ້ວ ຫຼາຍປະເທດເຊັ່ນ: ປະເທດລາວ, ປະເທດໄທ, ປະເທດຫວຽດນາມ, ປະເທດຈີນ, ປະເທດສີລັງກາ, ປະເທດອິນເດຍ ໂດຍມີເປົ້າໝາຍສ້າງສາຍສຳພັນທາງດ້ານການສຶກສາພຸດທະສາສນາໃຫ້ຈະເລີນງອກງາມ.

ປະເທດລາວເຮົາເຖິງແມ່ນວ່າຈະມີສະຖາບັນການສຶກສາທາງພຸດທະສາສນາຂັ້ນສູງພຽງສອງແຫ່ງ ແຕ່ຖ້າຫາກເປີດກວ້າງການຮ່ວມມືທາງດ້ານວິຊາການກ່ຽວກັບການສຶກສາທາງພຸດທະສາສນາກັບນານາປະເທດ ກໍຈະເຮັດໃຫ້ມີຄວາມກ້າວໜ້າໃນລະດັບສາກົນໃນອະນາຄົດຢ່າງແນ່ນອນ ແຕ່ພວກເຮົາຈະຕ້ອງ ໄດ້ບຸກບືນ ສ້າງບຸກຄະລາກອນ, ພັດທະນາວິຊາການທາງການສຶກສາໃຫ້ຫຼາຍຂຶ້ນກວ່າເກົ່າ.

ຂອບໃຈ: ຮູບຈາກ ພຣະອາຈານ ຄຳໃສ ຈັນທະລາດ ແລະ ພຣະອາຈານໄຊຍະເດດ ວົງໂສພາ

ດາວໂຫລດ: MOU ||ບົດບັນທຶກຄວາມເຂົ້າໃຈ

Ekaggacitto Bhikkhu

Lao Buddhism is a website designed for Lao Buddhist Community.

Ekaggacitto Bhikkhu has 64 posts and counting. See all posts by Ekaggacitto Bhikkhu

This site uses Akismet to reduce spam. Learn how your comment data is processed.