ຜົນສຳເລັດຂອງກອງປະຊຸມປະທານສົງ 3 ຊາດກຳປູເຈຍ, ລາວ,ຫວຽດນາມ

ເມື່ອວັນທີ 12-14 ພະຈິກທີ່ຜ່ານມາ, ທີ່ຫໍປະຊຸມແຫ່ງຊາດຫຼັກ 6 ໄດ້ມີການຈັດປະຊຸມປະທານສົງ ກໍາປູເຈຍ, ລາວແລະຫວຽດນາມຂຶ້ນ. ໃຫ້ກຽດເມດຕາເຂົ້າຮ່ວມເປັນປະທານກອງປະຊຸມຝ່າຍພຣະສົງມີ ພຣະອາຈາຣຍ໌ໃຫຍ່ ປອ.ມະຫາງອນ ດຳຣົງບຸນ, ປະທານສູນກາງອົງການພຸດທະສາສນາສຳພັນລາວ; ພຣະອາຈາຣຍ໌ໃຫຍ່ ຕິດ ທ່ຽນເຫຍີນ, ປະທານສະພາບໍລິຫານຄະນະສົງຫວຽດນາມ, ແລະ ສົມເດັດພຣະສັງຄະຣາຊ ເທບວົງ ແຫ່ງຣາຊະນາຈັກກຳປູເຈຍ.

46128305_2063290180649306_8336622781001105408_n

ເປັນກຽດເຂົ້າຮ່ວມເປັນປະທານກອງປະຊຸມພາຍນອກມີ ພະນະທ່ານ ປອ.ໄຊສົມພອນ ພົມວິຫານ, ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ, ທ່ານ ຈັນທະວົງ ແສນອຳມາດມົນຕີ, ຮອງປະທານແນວລາວສ້າງຊາດ ພ້ອມດ້ວຍການນຳພັກລັດ, ຄອບຄົວການນຳພັກລັດທຸກພາກສ່ວນ. ຝ່າຍຄະນະຜູ້ແທນສຳຄັນຈາກຕ່າງປະເທດປະກອບມີ ພະນະທ່ານ ຮີມເຊີນ, ລັດຖະມົນຕີອາວຸໂສ, ລັດຖະມົນຕີກະຊວງສາສນາແລະທຳມະການ ແຫ່ງຣາຊະນາຈັກກຳປູເຈຍ; ພະນະທ່ານ  ໂຣສ ກົງ ປະທານຄະນະກຳມະການ ແນວໂຮມສາມັກຄີພັດທະນາມາຕຸພູມ ແຫ່ງຣາຊະນາຈັກກຳປູເຈຍ; ພະນະທ່ານ ໂຫງ້ ເສັກທຶກ ຮອງປະທານແນວໂຮມແຫ່ງຊາດຫວຽດນາມ ພ້ອມດ້ວຍ ພະນະທ່ານ ຫງຽນ ບ່າ ຮ໋າງ, ເອກອັກຄະລັດຖະທູດຫວຽດນາມ ປະຈຳລາວ; ພະນະທ່ານ ເຊີ່ງ ມານິດ, ເອກອັກຄະຣາຊະທູດແຫ່ງຣາຊະນາຈັກກຳປູເຈຍ ປະຈຳລາວ ກໍໄດ້ເຂົ້າຮ່ວມ.

46075101_2062420370736287_7279807874086207488_n

ຈຸດປະສົງຂອງກອງປະຊຸມ ແມ່ນເພື່ອຍົກສູງມູນເຊື້ອສາຍພົວພັນມິດຕະພາບ, ຄວາມສາມັກຄີ ແລະການຮ່ວມມືລະຫວ່າງອົງການພຸດທະສາສນາສາມຊາດ ກຳປູເຈຍ, ລາວ ແລະຫວຽດນາມ ເພື່ອເປັນເງື່ອນໄຂການຮ່ວມມືໃນອະນຸພາກພື້ນແລະສາກົນ ໃນຍຸກໃໝ່.

ກອງປະຊຸມຄັ້ງນີ້ ເປັນການປະຊຸມຄັ້ງທຳອິດ ເຊິ່ງລາວເຮົາໄດ້ຮັບກຽດເປັນເຈົ້າພາບ ຈັດຂຶ້ນພາຍໃຕ້ການອຸປະຖຳແລະຊີ້ນຳຂອງພັກແລະລັດຖະບານ ໂດຍສະເພາະແມ່ນສູນກາງແນວລາວສ້າງຊາດ ພາຍໃຕ້ການຊີ້ນຳຂອງ ພະນະທ່ານ ປອ.ໄຊສົມພອນ ພົມວິຫານ, ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ແລະພາຍໃນຝ່າຍສົງ ມີສູນກາງອົງການພຸດທະສາສນາເປັນຜູ້ດຳເນີນງານ ພາຍໃຕ້ຄວາມເມດຕາຂອງຍາທ່ານໃຫຍ່ ປອ.ມະຫາງອນ ດຳລົງບຸນ, ປະທານສູນກາງອົງການພຸດທະສາສນາ ເຊິ່ງມີຄະນະຜູ້ແທນທັງພາຍໃນແລະຕ່າງປະເທດເຂົ້າຮ່ວມທັງໝົດ ຈຳນວນ 570 ກວ່າຄົນ.

46210075_2063289633982694_3622121490389925888_n

ກອງປະຊຸມໄດ້ດຳເນີນໄປດ້ວຍດີ ແລະປະສົບຜົນສຳເລັດ ເຊິ່ງປະທານສົງທັງສາມປະເທດ ໄດ້ເຊັນສັນຍາບົດບັນທຶກຊ່ວຍຈຳ ເພື່ອການຮ່ວມມືທັງສາມຝ່າຍແລະສອງຝ່າຍ ທາງດ້ານພຸດທະສາສນາ, ປະເພນີ, ວັດທະນະທັມທີ່ກ່ຽວຂ້ອງກັບພຸດທະສາສນາ ເພື່ອຍົກສູງສາຍພົວພັນມິດຕະພາບ, ຄວາມສາມັກຄີລະຫວ່າງພຸດທະສາສາ, ປະເພນີ, ວັດທະນະທັມອັນດີງາມ ຂອງປະຊາຊົນທັງສາມຊາດ ແລະເພື່ອສ້າງສັນຕິພາບ ແລະຄວາມສະຫງົບສຸກໃນພາກພື້ນແລະສາກົນຮ່ວມກັນ.

46159013_1924210774321766_1410612739138650112_n

ກອງປະຊຸມ ໄດ້ຕົກລົງເຫັນດີ ໃຫ້ປະເທດຫວຽດນາມເປັນເຈົ້າພາບຈັດກອງປະຊຸມໃນໂອກາດຕໍ່ໄປ. ເມື່ອສຳເລັດກອງປະຊຸມເປັນທີ່ຮຽບຮ້ອຍແລ້ວ ຄະນະກຳມະການຈັດກອງປະຊຸມ ໄດ້ນຳພາຄະນະຜູ້ແທນ ເຂົ້າຢ້ຽມຂ່ຳນັບ ພະນະທ່ານ ບຸນຍັງ ວໍຣະຈິດ, ປະທານປະເທດແຫ່ງ ສປປລາວ ທີ່ຫໍຄຳ ຈາກນັ້ນ ກໍໄດ້ນຳພາຄະນະຜູ້ແທນທັດສະນະສຶກສາ ທ່ຽວຊົມສະຖານທີ່ສຳຄັນຕ່າງໆໃນນະຄອນຫຼວງວຽງຈັນ ຈາກນັ້ນ ຄະນະຜູ້ແທນຈິ່ງໄດ້ເດີນທາງກັບປະເທດ.

46069892_2063137270664597_3239240828287188992_n

ຂອບໃຈຮູບພາບຈາກ: ເພຈ ເຜີຍແຜ່ສີລະທັມແລະວິປັດສະນາກັມມະຖານ

This site uses Akismet to reduce spam. Learn how your comment data is processed.