ຂຶ້ນຊື່ວ່າເປັນ..ທຸກຄົນຍ່ອມຕ້ອງການຄໍານີ້ ຄວາມເປັນພໍ່ແມ່, ຄວາມເປັນລຸງປ້າ,ອາວອາ, ຄວາມເປັນອ້າຍນ້ອງ ຄວາມເປັນຜົວເມຍ, ຄວາມເປັນຄົນຮັກ, ຄວາມເປັນໝູ່, ລວມໄປເຖິງຄວາມເປັນຄົນດີ ເປັນຕົ້ນ, ເຊັ່ນດຽວກັນ ຄົນໆໜຶ່ງຈະມີຊີວິດຢູ່ຢ່າງພູມໃຈ ແລະມີກຽດຍືນຢູ່ໃນສັງຄົມໄດ້ ຄົນນັ້ນຈະຕ້ອງມີຄວາມເປັນ..ຕິດຢູ່ໃນໂຕບໍ່ຫລາຍກໍໜ້ອຍ ໃນປື້ມເອກະສານຝຶກອົບຮົມ ສໍາລັບພຣະສົງແລະສາມະເນນ ຂອງຄະນະໂຄສະນາອົບຮົມສູນກາງພັກ ແລະສູນກາງແນວລາວສ້າງຊາດ ຈັດພິມໂດຍ ກົມອົບຮົມ ປີ ຄ.ສ.2010 ໜ້າ 10-12 ຂຽນໄວ້ວ່າ  ໃນຄວາມເປັນຈິງແລ້ວ ຄວາມເປັນຄົນລາວນັ້ນ ເຮົາຈະຮູ້ໄດ້ແທ້ແນ່ນອນກໍເມື່ອຄົນນັ້ນ ໄດ້ສະແດງອອກມາທາງກາຍະພາກດັ່ງນີ້:

  1. ຄົນລາວເປັນຄົນທີ່ມີມູນເຊື້ອຮັກຊາດ,ຮັກບ້ານເກີດເມືອງນອນ, ເດັດດ່ຽວປົກປັກຮັກສາຊາດໄວ້ໄດ້ຢ່າງຫມ້ັນຄົງ, ບໍ່ຍອມເປັນຂ້ອຍຂ້າຂອງຊາດອື່ນ.
  2. ຄົນລາວເປັນຄົນທີ່ມີຄວາມສາມັກຄີຮັກແພງຊ່ວຍເຫລືອເຊິ່ງກັນ ແລະ ກັນບໍ່ວ່າໃນໄລຍະຕໍ່ສູ້ ຫລືໃນເວລາທີ່ມີສັນຕິພາບແລ້ວ.
  3. ຄົນລາວເປັນຄົນທີ່ມີມະນຸດສະທໍາດີ, ເປັນຄົນຍິ້ມແຍ້ມແຈ່ມໃສໂອບເອື້ອອາລີ ຕໍ່ຜູ້ຄົນທີ່ເປັນແຂກມາຢ້ຽມຢາມ.
  4. ຄົນລາວແມ່ນຄົນທີ່ດຸຫມັ່ນຕື່ນເດິກລູກເຊົ້າ, ມີນໍ້າໃຈຕໍ່ສູ້ສູງເຊັ່ນ: ໃນຍາມສົງຄາມພ້ອມກັນຕໍ່ສູ້ກັບສັດຕູຜູ້ຮຸກຮານ, ໃນຍາມສັນຕິພາບພ້ອມກັນຕໍ່ສູ້ ກັບຄວາມທຸກຍາກເພື່ອເຮັດໃຫ້ຊີວິດມີຄວາມຜາສຸກ.
  5. ຄົນລາວເປັນຄົນບໍ່ມັກສົງຄາມ, ແຕ່ເປັນຄົນທີ່ຮັກສັນຕິພາບ.

6.ຄົນລາວເປັນຄົນທີ່ນັບຖືສາສະໜາພຸດ,ນັບຖືຮີດ 12 ຄອງ 14 ຢ່າງເຄັ່ງຄັດຊຶ່ງສະແດງອອກໃນແຕ່ລະເດືອນຂອງທຸກໆປີ ພໍຮອດກໍານົດ ກໍ່ຈະພ້ອມກັນເຮັດບຸນທາງສາສະໜາຕ່າງໆ ເຊັ່ນ: ບຸນອອກພັນສາ, ບຸນທາດຫລວງ, ບຸນຫົດນ້ໍາ ໂດຍພ້ອມພຽງກັນເຮັດຢ່າງເບີກບານມ່ວນຊື່ນ.

  1. ຄົນລາວເປັນຄົນທີ່ບໍ່ດໍາລົງຊີວິດຢ່າງໂດດດ່ຽວ ຢູ່ນ້ອຍກິນດຽວ ຫລືແຍກຕົນອອກຕ່າງຫາກເວລາໃດກໍ່ຕຸ້ມຕອມກັນ; ມີບັນຫາເກີດຂຶ້ນມັກປຶກສາຫາລືກັນເພື່ອຊອກທາງອອກ.
  2. ຄົນລາວເປັນຄົນທີ່ມີກຽດ, ສັກສີສູງສົ່ງ ຊຶ່ງເວລາໃດກໍ່ຮັກສາກຽດແລະ ສັກສີຂອງລາວໄວ້.
  3. ຄົນລາວແມ່ນເປັນຄົນທີ່ມີຫົວຄິດປະດິດສ້າງ, ມັກສະແຫວງຫາຄວາມຮູ້ ເພື່ອຄວາມກ້າວໜ້າຂອງຕົນເອງ ແລະ ປະເທດຊາດ.
  4. ຄົນລາວເປັນຄົນທີ່ອົດທົນ, ອົດກັ້ນສູງຕໍ່ທຸກບັນຫາທີ່ເກາະຜິດຂອງພວກທີ່ບໍ່ຫວັງດີ ເວລາໃດກໍ່ຊອກຫາທາງແກ້ບັນຫາດ້ວຍສັນຕິວິທີ.
  5. ຄົນລາວເປັນຄົນທີ່ຊື່ສັດ, ບໍ່ເປັນຄົນຂີ້ຕົວະ, ບໍ່ລັກເອົາສິ່ງຂອງຜູ້ອື່ນມາເປັນຂອງຕົນ.
  6. ຄົນລາວເປັນຄົນທີ່ປະຢັດ, ບໍ່ໃຊ້ຈ່າຍຟູມເຟືອຍ, ໃຊ້ຈ່າຍໃນສິ່ງທີ່ຈໍາເປັນແລະເປັນປະໂຫຍດ.
  7. ຄົນລາວເປັນຄົນທີ່ມີສະຕິເຄົາລົບກົດໝາຍບ້ານເມືອງຢ່າງສູງ; ບໍ່ສໍ້ລາດບັງຫລວງ ແລະອື່ນໆ. ນັ້ນແມ່ນບາງຈຸດພິເສດຂອງຄົນລາວ ຫລື ເອີ້ນວ່າເອກະລັກສະເພາະຂອງຄວາມເປັນຄົນລາວ, ແຕ່ຄວາມຈິງກໍ່ຍັງມີຫລາຍໆອັນອີກ ທີ່ຜູ້ຂຽນຈະຄ່ອຍນໍາສະເໜີໃຫ້ເຫັນຄວາມດີຂອງການເກີດເປັນຄົນລາວ,

ຄວາມເປັນລາວທັງໝົດທີ່ໄດ້ຂຽນມາທັງ 13 ຂໍ້ນັ້ນ ເປັນການສະແດງອອກຂອງຄວາມເປັນຄົນລາວທີ່ແທ້ຈິງ ມີຄຸນສົບບັດສີນທັມປະຕິວັດ ພວກເຮົາຄົນລາວທຸກຄົນຈະສະແດງອອກໃນຄວາມເປັນຄົນລາວທີ່ແທ້ຈິງໄດ້ ກໍ່ຕໍ່ເມື່ອພວກເຮົາທຸກຄົນ ໄດ້ຊ່ວຍພັດທະນາຕົນເອງໃຫ້ຈະເລີນຕາມຫລັກການທີ່ໄດ້ກ່າວໄວ້ແລ້ວ ເຮັດຕົນເອງໃຫ້ຕື່ນໂຕກັບການຮຽນຮູ້ ພັດທະນາຕົນເອງໃຫ້ຈະມີຄວາມຈະເລີນໃນຫລາຍໆດ້ານ ກໍຈະນຳພາຕົນເອງແລະຊາດລາວເຮົາ ຫລຸດພົ້ນຈາກຄວາມທຸກຍາກ ແລະຄວາມດ້ອຍພັດທະນາໃນຫລາຍດ້ານ ໃນປີ 2020 ໃຫ້ສໍາເລັດແລະປະກົດຜົນເປັນຈິງຂຶ້ນໄດ້ໃນໄວໆນີ້ຢ່າງແນ່ນອນ.

ໂດຍ: ກວາງປ່າ  ວາທະການ

This site uses Akismet to reduce spam. Learn how your comment data is processed.