ການນັບຖືກັນ

ໃນຊີວິດຂອງຄົນເຮົາ ບໍ່ມີໃຜທີ່ບໍ່ຕ້ອງການຄົນນັບຖື ແລະກໍບໍ່ມີໃຜທີ່ບໍ່ຕ້ອງການຄົນເຂົ້າໃຈແລະຍອມຮັບຟັງຄວາມຄິດເຫັນຂອງຕົນເອງ ການນັບຖືກັນເລີ້ມມາແຕ່ ພື້ນຖານຄອບຄົວ ອ້າຍນ້ອງນັບຖືກັນ ຜົວເມຍນັບຖືກັນ ສິດກັບອາຈານ ລູກນ້ອງກັບເຈົ້ານາຍ ມິດສະຫາຍດ້ວຍກັນ ເຊັ່ນດຽວກັນຄົນໃນສັງຄົມລາວເຮົາ ກໍຍອມມີສິ່ງທີ່ສູງສຸດໃນການນັບຖືນັ້ນກໍຄືລັດຖະທັມມະນູນແຫ່ງ ສາທາລະນະລັດ ປະຊາທິປະໄຕປະຊາຊົນລາວ ທີ່ມີການນຳພາຂອງພັກ ແລະຄະນະລັດຖະບານ ບໍລິຫານປະເທດຊາດ ໄດ້ຢ່າງສະຫງ່າຜ່າເຜີຍ ໂດຍແບ່ງການເຮັດວຽກ ແລະການທຳງານຕາມຂັ້ນການນັບຖືກັນດັງນີ້ຄື:

  1. ຂັ້ນສູນກາງ;
  2. ຂັ້ນແຂວງ;
  3. ຂັ້ນເມືອງແລະ
  4. ຂັ້ນຮາກຖານ

ໃນປະເທດຊາດຂອງພວກເຮົາ ມີຄວາມສະຫງົບສຸກໄດ້ພາຍໃນປະເທດ ຍ້ອນມີລັດຖະທໍາມະນູນເປັນຫຼັກໃນການໃຫ້ປະຊາຊົນທຸກຄົນບັນດາເຜົ່າ ໃຫ້ໄດ້ຮັບຄວາມຍຸດຕິທຳ ແລະຄຸ້ມຄອງປະຊາຊົນໃຫ້ໄດ້ຮັບສິດຜົນປະໂຫຍດຕາມກົກໝາຍ ຕາມຄວາມສາມາດຂອງຕົນເອງ ການນັບຖືກັນໄດ້ ກໍຍ້ອນວ່າມີຫຼັກແຫ່ງການນັບຖື ຄົນທຸກຄົນໃນສັງຄົມລາວ ມີຄວາມເຄົາລົບໃນກົດໝາຍ ແລະປະຕິບັດຕົນຕາມນະໂຍບາຍຂອງພັກ-ລັດ ທີ່ໄດ້ກໍາໜົດແນວທາງໃຫ້ທຸກຄົນໃນປະເທດຊາດ ບໍ່ໃຫ້ຂາດຫຼັກໝັ້ນໃນການຢູ່ຮ່ວມກັນໃນສັງຄົມລາວເຮົາ

ແນ່ນອນວ່າ ໃນໂລກໜ່ວຍນີ້ ຈະບໍ່ມີໃຜເລີຍທີ່ບໍ່ຕ້ອງການກົດລະບຽບ ແລະຈະເປັນການແນ່ນອນອີກວ່າ ໃນໂລກໜ່ວຍນີ້ຈະບໍ່ມີທີ່ແຫ່ງໃດເລີຍທີ່ຈະບໍ່ມີກົດໝາຍ ຫຼື ກົດກະຕິກາໃນການຢູ່ຮ່ວມກັນ ບໍ່ວ່າຈະຢູ່ບ້ານ ຈະຢູ່ໃນເມືອງ ຫຼືວ່າຈະຢູ່ໃນປ່າ ທຸກຄົນຕ້ອງມີກົດກະຕິຕໍ່ກັນ ເຊ່ັນ: ໂຈນໃນປ່າ ເວລາຈະອອກປຸ້ນກໍຍ່ອມມີກົດກະຕິກາ ວ່າເວລາໃດຄວນປຸ້ນ ເວລາໃດບໍ່ຄວນປຸ້ນ ເວລາໃດຄວນນອນພັກ ເວລາໃດຄວນຕື່ນ ແລະການປຸ້ນ ເປັນຕົ້ນ.

ການນັບຖືກັນ ເປັນການໃຫ້ກຽດເຊິ່ງກັນແລະກັນ ໃນທາງຄວາມສາມາດ ແລະຄວາມດີທີ່ອີກຝ່າຍມີຢູ່ ແລ້ວຈະແລກປ່ຽນຮຽນຮູ້ເຊິ່ງກັນແລະກັນ ຜ່ານການພົວພັນທາງການເຮັດວຽກຮ່ວມກັນ ວ່າມີອັນໃດຜິດພາດກໍຈະແກ້ໄຂໃຫ້ດີຂຶ້ນ ເຊັ່ນ: ນັກຮຽນໃນຫ້ອງຮຽນໜຶ່ງ ມີຄົນໜຶ່ງທີ່ຮຽນເກັ່ງ ແລະມີຄວາມປະພຶດດີ ກໍຈະເປັນທີ່ນັບຖືຂອງຄູອາຈານ ແລະໝູ່ເພື່ອນ ໃນການຫຼິ້ນກິລາມີໃຜແດ່ ທີ່ເກັ່ງແລະການນໍາຫຼຽນຄໍາໄດ້ມາໃຫ້ກຸ່ມຂອງຕົນເອງໄດ້ກໍຍ່ອມຈະໄດ້ຮັບການນັບຖື. ໃນຄອບຄົວຜົວເມຍ ຫາກຢູ່ນໍາກັນຢ່າງຈິງໃຈແລະເຂົ້າໃຈກັນ ປະພຶດຕົນເອງເປັນແບບຢ່າງທີ່ດີ ກໍຍ່ອມຈະໄດ້ຮັບການນັບຖືຈາກລູກໆຂອງຕົນ ເຊັ່ນດຽວກັນກັບ ຜູ້ນໍາຂອງຊາດລາວເຮົາ ຜູ້ນຳທີ່ໜ້ານັບຖືມີຫຼາຍທ່ານ ທີ່ເປັນຫຼັກໃຈໃຫ້ປະຊາຊົນຄົນລາວເຮົາ ມີແຮງໃຈໃນການເຮັດຄວາມດີ ແລະຖືທ່ານເຫຼົ່ານັ້ນເປັນແບບຢ່າງໃນການດໍາເນີນຊີວິດຢູ່ ໃນສັງຄົມໃຫ້ມີຄວາມຮູ້ ຄວາມສາມາດ ແລະຄວາມດີໃນການໃຊ້ຊີວິດ ບໍ່ວ່າຈະເປັນເດັກນ້ອຍ ໄວໜຸ່ມ ໄວສາວ ໄວຄົນແກ່ ກໍໄດ້ຮັບຮູ້ວ່າ ທ່ານເຫຼົ່ານັ້ນຄື: ວິລະບຸລຸດ ທີ່ຫາມະນຸດຄົນໃດຈະເຮັດຄືເພີ່ນໄດ້ຍາກ ເຊັ່ນ  ພຣະເຈົ້າຟ້າງຸ່ມມະຫາລາດ, ພຣະເຈົ້າໄຊຍະເຊດຖາທິລາດ, ພຣະເຈົ້າອະນຸວົງ, ທ່ານສຸພານຸວົງ, ທ່ານໄກສອນ ພົມວິຫານ, ຯລຯເປັນຕົ້ນ

ບັນດາທ່ານເຫຼົ່ານັ້ນ ມີຄວາມດີໜ້ານັບຖື ໃຫ້ປະຊາຊົນຄົນລາວບັນດາເຜົ່າ ໃຫ້ເຫັນວ່າ ຄົນລາວເຮົາ ບໍ່ສິ້ນຄົນດີ ມີຄົນທີ່ໜ້ານັບຖື ມີຄົນທີ່ໂລກໄດ້ຈື່ຈຳວ່າ ຊາດລາວເຮົາເປັນປະເທດຊາດທີ່ບໍ່ຂາດຄົນນັບຖື    ເພາະການນັບຖືກັນ ເປັນການຜູກສໍາພັນລະຫວ່າງຄົນກັບຄົນ ໃນການຢູ່ຮ່ວມກັນໃນສັງຄົມ ໃຫ້ມີຄວາມສາມັກຄີກັນ ດັ່ງເນື້ອໃນຂອງບົດເພງບາງຕອນຂອງຊາດລາວເຮົາຮ້ອງວ່າ: ຊາດລາວຕັ້ງແຕ່ໃດມາ ລາວທຸກທົ່ວໜ້າເຊີດຊູສຸດໃຈ ຮ່ວມແຮງຮ່ວມຈິດຮ່ວມໃຈ ສາມັກຄີກັນເປັນກຳລັງດຽວ ເດັດດ່ຽວພ້ອມກັນກ້າວໜ້າ ບູຊາຊູກຽດຂອງລາວ ສົ່ງເສີມໃຊ້ສິດເປັນເຈົ້າ ລາວທຸກຊົນເຜົ່າສະເໝີພາບກັນ ຯ ເປັນຕົ້ນ ຈະເຫັນໄດ້ວ່າ ບູຊາຊູກຽດຂອງລາວນັ້ນ ກໍຄື: ສະແດງໃຫ້ເຫັນວ່າ ຊາດລາວເຮົາສົ່ງເສີມຄົນໃຫ້ນັບຖືກັນແລະກັນ ນັບຖືຄວາມຖືກຕ້ອງຕາມລັດຖະທໍາມະນູນການປົກຄອງ ນັບຖືການນໍາພາຂອງພັກແລະລັດ ໂດຍສະເພາະຢ່າງຍິ່ງ ໃຫ້ນັບຖືຕົນເອງມີຄຸນສົມບັດສີນທໍາປະຕິວັດ ໃຫ້ມີກຽດໃນສັງຄົມທີ່ຕົນໄດ້ອາໄສຢູ່ຢ່າງແທ້ຈິງ.

ສະຫຼຸບໄດ້ວ່າ ການນັບຖືກັນກໍຄືການຍອມຮັບໃນຄວາມດີຂອງຄົນອື່ນ ແລະຫາກມີໂອກາດເຮົາກໍຈະໄດ້ປະຕິບັດຕາມແບບຢ່າງທີ່ດີຂອງເພິ່ນ ເພື່ອເປັນການພັດທະນາຕົນເອງໃຫ້ດີແລະມີຄວາມຮູ້ຄວາມສາມາດ ແລະສະຫຼາດໃນການໃຊ້ຊີວິດ ໂດຍບໍ່ເປັນພິດເປັນໄພຕໍ່ສັງຄົມທີ່ຕົນຢູ່ ເຊື່ອແນ່ວ່າ ການນັບຖືກັນຈະເປັນປະໂຫຍດຫລາຍໃນການໃຫ້ຄົນດີມີຄວາມສາມາດເກີດຂຶ້ນມາຫຼາຍ ໃນສັງຄົມລາວເຮົາ ແລະຊາດລາວເຮົາຈະມີຄົນເກັ່ງ ຄົນດີມີຄວາມສາມາດ ເປັນທີ່ນັບໜ້າຖືຕາ ດັ່ງຄໍາວ່າ ເດັັດດ່ຽວພ້ອມກັນກ້າວໜ້າ  ແລະພາຊາດກ້າວໄປສູ່ຄວາມວັດທະນາຖາວອນ.

ໂດຍ: ກວາງປ່າ ວາທະການ

PM.Wiravath Vilaychak

Phramahā Wiravath Vilaychak, Pāli Grade VI, MA in Public Administration

PM.Wiravath Vilaychak has 4 posts and counting. See all posts by PM.Wiravath Vilaychak

This site uses Akismet to reduce spam. Learn how your comment data is processed.