ເທສະການສະເຫຼີມສະຫຼອງວັນວິສາຂະບູຊາສຳຄັນຢ່າງໃດ?

ບຸນວິສາຂະບູຊາ ເປັນປາງບຸນທີ່ລະນຶກເຖິງວັນປະສູດ, ຕຣັສຮູ້, ແລະປະຣິນິພພານຂອງອົງສົມເດັດພຣະສັມມາສັມພຸດທະເຈົ້າ. ໝາຍຄວາມວ່າ ທັງສາມເຫດການນີ້ ເກີດຂື້ນກົງກັບເດືອນຫົກເພັງ ເຊິ່ງເປັນເຫດການມະຫັດສະຈັນທີ່ກົງກັນທັງສາມເຫດການ ຫາປາກົດການແບບນີ້ຍາກໃນໂລກ.

ວິສາຂະ ແປວ່າ ເດືອນຫົກ, ບູຊາ ກໍໝາຍເຖິງການເຄົາຣົບບູຊາ. ເມື່ອລະນຶກເຖິງເຫດການອັນສຳຄັນແຫ່ງການປະສູດ, ຕຣັສຮູ້ ແລະພຣະນິພພານຂອງອົງສົມເດັດພຣະສັມມາສັມພຸດທະເຈົ້າຄືແນວນັ້ນ ພວກເຮົາທັງຫຼາຍທີ່ເປັນຊາວພຸດຈິ່ງໄດ້ພາກັນຈັດງານບຸນສຳຄັນນີ້ຂຶ້ນມາແຕ່ບູຮານນະການ ແຕ່ການຈັດງານຜ່ານມາດັ່ງກ່າວນັ້ນ ແມ່ນບໍ່ຖືວ່າໂດດເດັ່ນເທົ່າທີ່ຄວນ ເໝືອນດັ່ງໃນປັດຈຸບັນ.

ງານບຸນວິສາຂະບູຊານີ້ ເຄີຍຖືກນຳສະເໜີໃນກອງປະຊຸມຊາວພຸດໂລກທີ່ຈັດຂຶ້ນໃນປະເທດສີລັງກາເມື່ອປີ 1950, ກອງປະຊຸມໄດ້ຮັບຮອງເອົາເດືອນຫົກເພັງຂອງທຸກໆປີເປັນການສະຫຼອງງານບຸນນີ້ເພື່ອຖວາຍເປັນພຸດທະບູຊາ ແຕ່ໃນຕອນນັ້ນ ກໍບໍ່ມີເທົ່າໃດປະເທດມີການຕື່ນຕົວສະເຫຼີມສະຫຼອງ ມີພຽງແຕ່ປະເທດເຈົ້າພາບແລະປະເທດເນປານເທົ່ານັ້ນ. ສ່ວນປະເທດອື່ນໆກໍຈະມີການສະເຫຼີມສະຫຼອງໂດຍທີ່ຈັດເປັນປະເພນີຂອງແຕ່ລະປະເທດ ເຊັ່ນບ້ານເຮົາກໍມັກມີການເຮັດບຸນເດືອນຫົກເພັງ ຕາມວັດທີ່ມີບູຮານວັດຖູ ພຣະທາດເຈດີສຳຄັນ ຕົວຢ່າງເຊັ່ນ: ທີ່ເມືອງຈຳປາສັກ ກໍມີການເຮັດບຸນເພັງທາດ ທີ່ວັດທາດ ເພື່ອນ້ອມຖວາຍເປັນພຸດທະບູຊາ ແລະບູຊາເຈດີຂອງຍາຄູຂີ້ຫອມເປັນຕົ້ນ ສ່ວນພາກສ່ວນວັດສຳຄັນອື່ນໃນປະເທດລາວກໍອາດຈະມີ.

ເມື່ອມາຮອດປີ 1999, ກອງປະຊຸມຜູ້ນຳສົງທີ່ໄດ້ຈັດຂຶ້ນທີ່ປະເທດສີລັງການອີກ ໄດ້ສະເໜີງານບຸນສຳຄັນດັ່ງກ່າວຕໍ່ອົງການສະຫະປະຊາຊາດ ໃຫ້ເຫັນໄດ້ວ່າ ພຣະພຸດທະສາສນາເປັນສາສນາທີ່ສົ່ງເສີມສັນຕິພາບໂລກ, ເປັນສາສນາທີ່ສັ່ງສອນຫຼັກແຫ່ງຄວາມເມດຕາ, ຫຼັກສັນຕິພາບ, ຫຼັກແຫ່ງສະຕິປັນຍາ ແລະໄດ້ສະເໜີໃຫ້ຖືເອົາເດືອນຫົກເພັງຂອງທຸກໆປີເປັນວັນສຳຄັນສາກົນຂອງໂລກ. ສະນັ້ນ, ທາງອົງການສະຫະປະຊາຊາດຈິ່ງປະກາດຮັບຮອງເອົາວັນດັ່ງກ່າວນີ້ເປັນວັນສຳຄັນສາກົນຂອງໂລກແລະທຸກໆປີຈະມີການສະຫຼອງທີ່ສຳນັກງານອົງການສະຫະປະຊາຊາດ.

ເມື່ອເປັນແນວນັ້ນແລ້ວ, ອົງການຊາວພຸດທົ່ວໂລກ ຈິ່ງໄດ້ຮ່ວມກັນຈັດກອງປະຊຸມວິສາຂະໂລກຂຶ້ນທຸກໆປີ ເປັນເວລາ 16 ປີຜ່ານມາແລ້ວ ເຊິ່ງຄັ້ງນີ້ ໄດ້ຈັດຂື້ນຢູ່ປະເທດຫວຽດນາ ເປັນຄັ້ງທີ 16 ແລະຫວຽດນາມກໍເປັນເຈົ້າພາບມາແລ້ວ 3 ຄັ້ງລວມທັງຄັ້ງນີ້ ນອກນັ້ນແມ່ນຈັດຢູ່ປະເທດໄທ ໂດຍມະຫາວິທະຍາໄລມະຫາຈຸລາລົງກອນຣາຊະວິທະຍາໄລເປັນຫຼັກໃນເວລາຜ່ານມາ. ແຕ່ລະຄັ້ງທີ່ຈັດກອງປະຊຸມວິສາຂະໂລກ ຈະມີຜູ້ແທນຊາວພຸດທົ່ວໂລກປະມານ 5,000 ກວ່າຄົນ ຈາກ 100 ກວ່າປະເທດ ລວມມີນັກປາດ,​ນັກວິຊາການ, ນັກປະຖະກະຖາ, ນັກການເມືອງ, ປະມຸກລັດຂອງແຕ່ລະປະເທດເຂົ້າຮ່ວມຢ່າງຊົງກຽດ ເພື່ອຮ່ວມສະຫຼອງວັນແຫ່ງສັນຕິພາບນີ້.

ເມື່ອເປັນແນວນັ້ນແລ້ວ ກອງປະຊຸມວິສາຂະ ແລະງານສະຫຼອງວິສາຂະໃນລະດັບສາກົນ ຈິ່ງບໍ່ເປັນພຽງແຕ່ການສະຫຼອງເພື່ອນ້ອມຖວາຍເປັນພຸດທະບູຊາໃນນາມຊາວພຸດເທົ່ານັ້ນ ແຕ່ຍັງເປັນການພົບປະກັນລະຫວ່າງຜູ້ນຳຂອງໂລກ ເພື່ອການຮ່ວມມືກັນໃນຫລາຍດ້ານອີກພ້ອມ, ເພື່ອຮັດແໜ້ນຄວາມສາມັກຄີໃນຂົງເຂດເສດຖະກິດ, ການເມືອງ, ສີລະປະວັດທະນະທຳ, ແລະການສຶກສາ ເວົ້າລວມກໍຄືເສີ່ມຂະຫຍາຍທາງດ້ານການທູດໃຫ້ໂດດເດັ່ນຂຶ້ນ ໂດຍຖືເອົາພຸດທະສາສນາເປັນສື່ກາງແຫ່ງການຮ່ວມມື.

ເມື່ອຫັນມາເບິ່ງປະເທດລາວເຮົາ. ກະແສແຫ່ງການສະເຫຼີມສະຫຼອງງານບຸນວິສາຂະກໍເປັນທີ່ປະຈັກຕາແລະຟົດຟື້ນພໍສົມຄວນ ຈະເຫັນໄດ້ວ່າທາງແຂວງພາກເໜືອເຊັ່ນຫຼວງນ້ຳທາ, ບໍ່ແກ້ວ, ໄຊຍະບູລີ ແລະພາກໃຕ້ ສະຫວັນນະເຂດ ແລະທຸກຂົງເຂດກໍເລີ່ມມີການຕື່ນຕົວໃຫ້ຄວາມສຳຄັນໃນການຈັດງານພາຍໃຕ້ການຮ່ວມມືກັນລະຫວ່າງພຣະສົງແລະການນຳພັກລັດ ພໍ່ແມ່ປະຊາຊົນບັນດາເຜົ່າ.​ ສິ່ງທີ່ໂດດເດັ່ນໄປກວ່ານັ້ນກໍຄື ຂັ້ນສູນກາງຈະໄດ້ມີການຈັດງານສະເຫຼີມສະຫຼອງຂື້ນຢ່າງຍິ່ງໃຫຍ່ທີ່ຫໍປະຊຸມແຫ່ງຊາດ ແລະວັດພຣະທາດຫຼວງເໜືອໃນລະຫວ່າງວັນທີ 16-18 ທີ່ຈະມາເຖິງນີ້.

ສະຫຼຸບຄື ບໍ່ວ່າງານສະເຫຼີມສະຫຼອງງານບຸນວິສາຂະບູຊາ ຈະໄດ້ມີການຈັດຢູ່ໃນລະດັບພາຍໃນຫຼືຕ່າງປະເທດ ລ້ວນແຕ່ສະແດງໃຫ້ເຫັນເຖິງສັດທາ, ການຮ່ວມມື, ຄວາມສາມັກຄີຂອງປວງຊົນ ແລະເປັນຜົນດີຕໍ່ການສົ່ງເສີມແນວທາງແຫ່ງຄວາມສາມັກຄີ ແລະສັນຕິພາບໃຫ້ເກີດມີໃນສັງຄົມ ແລະໃນໂລກ ຂໍພຽງແຕ່ພວກເຮົາໃນນາມທີ່ເປັນຊາວພຸດຫາກພ້ອມພຽງກັນ ເສີມສ້າງງານດັ່ງກ່າວໃຫ້ບັນລຸເປົ້າໝາຍແລະປະສົບຜົນສຳເລັດດ້ວຍດີ ແລະສືບຕໍ່ປະຕິບັດເລື້ອຍໄປໃນປີຕໍ່ໆໄປ.

Ekaggacitto Bhikkhu

Lao Buddhism is a website designed for Lao Buddhist Community.

Ekaggacitto Bhikkhu has 81 posts and counting. See all posts by Ekaggacitto Bhikkhu

This site uses Akismet to reduce spam. Learn how your comment data is processed.