ພິທີເປີດຫ້ອງການກຳມາທິການຕ່າງປະເທດຂອງສູນກາງ ອພສ

ເມື່ອວັນທີ 1 ເດືອນສິງຫາ 2019, ທາງສູນກາງອົງການພຸດທະສາສນາໄດ້ມີພິທີເປີດຫ້ອງການຄະນະກຳມາທິການພົວພັນຕ່າງປະເທດຂຶ້ນ ທີ່ຫໍທັມມະສະພາ ວັດພຣະທາດຫລວງເໜືອ. ເປັນປະທານເຂົ້າຮ່ວມຝ່າຍພຣະສົງໂດຍ ຍາທ່ານໃຫຍ່ ມະຫາງອນ ດຳລົງບຸນ ປະທານສູນກາງອົງການພຸດທະສາສນາສຳພັນລາວ ແລະໃຫ້ກຽດເປັນປະທານຝ່າຍຄະຣາວາດໂດຍ ພະນະທ່ານແສງເພັດ ຮຸ່ງບຸນຍວງ ຮອງລັດຖະມົນຕີກະຊວງການຕ່າງປະເທດ. ນອກນີ້ກໍມີຕາງໜ້າຈາກກະຊວງພາຍໃນແລະສູນກາງແນວລາວສ້າງຊາດ ພ້ອມດ້ວຍຄູບາອາຈານແລະຄອບຄົວການນຳ, ພຣະສົງຈາກສະຫະພາບມຽນມ້າ ແລະຕົວແທນຈາກມະຫາຈຸລາລົງກອນຣາຊະວິທະຍາໄລແຫ່ງຣາຊະນາຈັກໄທ ກໍໄດ້ເຂົ້າຮ່ວມເພື່ອເປັນສິລິມຸງຄຸນແລະເປັນສັກຂີພະຍານແຫ່ງຫວັດສາດທາງພຸດທະສາສນາໃນການບໍລິຫານງານ ຄະນະສົງລາວໃນຍຸກປັດຈຸບັນ.

.jpg

ຜ່ານມາອົງການພຸດທະສາສນາສຳພັນລາວ ມີ 4 ຄະນະກຳມາທິການໃຫຍ່ຄື: ກຳມາທິການປົກຄອງສົງສູນກາງ, ກຳມາທິການສຶກສາສົງສູນກາງ, ກຳມາທິການເຜີຍແຜ່ສີລະທັມແລະວິປັດສະນາກຳມະຖານ, ກຳມາທິການສາທາລະນູປະການ, ແລະທີ່ສ້າງຕັ້ງຂຶ້ນໃໝ່ນີ້ແມ່ນ ກຳມາທິການພົວພັນຕ່າງປະເທດ ໂດຍໄດ້ຜ່ານການເຫັນດີມີມະຕິເປັນເອກະສັນຈາກກອງປະຊຸມໃຫຍ່ຂອງສູນກາງອົງການພຸດທະສາສນາສຳພັນລາວທີ່ໄດ້ຈັດຂຶ້ນໃນຕົ້ນປີ.

ເນື່ອງຈາກວ່າ ຄະນະກຳມາທິການຕ່າງປະເທດນີ້ ເປັນຂະແໜງງານໜຶ່ງທີ່ມີຄວາມສຳຄັນຮັບຜິດຊອບວຽກງານການພົວພັນຕ່າງປະເທດ ຕ້ອງໄດ້ຮຽນຮູ້ ແລະນຳໃຊ້ພາສາຕ່າງປະເທດໄດ້ໃນລະດັບດີພໍສົມຄວນ ພ້ອມທັງມີຄວາມຮູ້ທາງຫລັກການທູດ.  ສະນັ້ນ ທາງຫ້ອງການສູນກາງ ອພສ ຈິ່ງໄດ້ຄັດເລືອກເອົາບັນດາພຣະສົງທີ່ມີຄວາມຮູ້ຄວາມສາມາດແລະມີຄຸນສົມບັດດີ ມີຈິດໃຈກວ້າງຂວາງ ພ້ອມທີ່ຈະເສຍສະລະເຮັດໜ້າທີ່ເພື່ອຕາງໜ້າໃຫ້ແກ່ປະເທດຊາດແລະພຣະພຸດທະສາສນາໃນລາວ ຈິ່ງໄດ້ຄັດເລືອກເອົາຜູ້ທີ່ມີຄຸນສົມບັດດີ ມີສີລະທັມແລະຄຸນນະທັມສູງ ບໍ່ເຮັດວຽກເພື່ອຜົນປະໂຫຍດສ່ວນຕົນຫລາຍກວ່າສ່ວນລວມ, ໃນນີ້ເພື່ອໄດ້ຄັດເລື່ອກເອົາພຣະສົງທີ່ມີລະດັບການສຶກສາໃນລະດັບປະລິນຍາຕີ 4 ອົງ, ປະລິນຍາໂທ 2 ອົງ ແລະປະລິນຍາເອກ 4 ອົງ ເພື່ອມາດຳເນີນງານ.

.jpg

ການຈັດຕັ້ງກຳມາທິການພົວພັນຕ່າງປະເທດຂອງສຳນັກງານອົງການພຸດທະສາສນາສຳພັນລາວ ເປັນບ້າວກ້າວໃໝ່ທີ່ສຳຄັນ ແລະເປັນໂສມໜ້າໃໝ່ທາງປະຫວັດສາດຂອງອົງການຄະນະສົງລາວ ທີ່ຈະເຮັດໜ້າທີ່ເສີມສ້າງສາຍພົວພັນມິດຕະພາບກັບບັນດານານາປະເທດທີ່ມີການເຄື່ອນໄຫວວຽກງານທາງພຸດທະສາສນາຮ່ວມກັນແລະວຽກງານອື່ນໆທີ່ກ່ຽວຂ້ອງ ພຣະສົງລາວ ຈະໄດ້ເຮັດໜ້າທີ່ສາຍພົວພັນທາງສະມະນະທູດໃນເວທີສາກົນ ເປັນຕົ້ນວ່າ ການເຂົ້າຮ່ວມປະຊຸມນານາຊາດ, ການຈັດປະຊຸມນານາຊາດ, ການເຜີຍແຜ່ຫລັກທັມຄຳສອນທາງພຸດທະສາສນາ, ການພົວປະແລກປ່ຽນຄວາມຮູ້ທາງພຸດທະສາສນາຕະຫລອດຮອດປະເພນີວັດທະນະທຳອັນດີງາມຂອງຊາດຕົນຄຽງຄູ່ກັບພັກແລະລັດຖະບານ ເພື່ອແລກປ່ຽນແລະຖອດຖອນບົດຮຽນກັບນານາຊາດ.

family.jpgກກກ.jpg

ຂອບໃຈຮູບພາບຈາກ: ເພຈ ວັດໃໝ່ໂຊກຄຳ ແລະກະຄະກຳມະການພົວພັນຕ່າງປະເທດ ສູນກາງ ອພສ

 

Ekaggacitto Bhikkhu

Lao Buddhism is a website designed for Lao Buddhist Community.

Ekaggacitto Bhikkhu has 100 posts and counting. See all posts by Ekaggacitto Bhikkhu

This site uses Akismet to reduce spam. Learn how your comment data is processed.