ພິທີເປີດມູນນິທິສົ່ງເສີມການສຶກສາສົງ

ເມື່ອວັນທີ 18 ກັນຍາ 2019 ທີ່ຜ່ານມາ ທີ່ຫໍປະຊຸມ ICTC, ນະຄອນຫລວງວຽງຈັນ ໄດ້ມີພິທີເປີດ ມູນນິທິສົ່ງເສີມການສຶກສາສົງຂຶ້ນ, ພາຍໃຕ້ການເປັນປະທານໃນພິທີ ໂດຍ ພຣະອາຈາຣຍ໌ໃຫຍ່ ມະຫາງອນ ດຳລົງບຸນ, ປະທານສູນກາງອົງການພຸດທະສາສນາສຳພັນລາວ. ປະທານຜູ້ກໍ່ຕັ້ງມູນນິທິດັ່ງກ່າວແມ່ນ ພຣະອາຈານໃຫຍ່ ບຸນທະວີ ປະສິດທິສັກ, ເຈົ້າອະທິການວັດຈອມທອງ, ຫົວໜ້າກຳມາທິການສາທາຣະນູປະການ ສູນກາງອົງການພຸດທະສາສນາສຳພັນ ລາວ(ອພສ), ເປັນຄະນະປະຈຳສູນກາງ ອພສ.

ຈຸດປະສົງຂອງການສ້າງຕັ້ງມູນນິທິນີ້ ແມ່ນເພື່ອຊ່ວຍເຫລືອ ແລະສະໜັບສະໜູນພຣະສົງສາມະເນນ ທີ່ດ້ອຍໂອກາດທາງດ້ານການສຶກສາ ພຣະທັມວິໄນ ແລະຄວາມຮູ້ທາງໂລກ ທີ່ຢູ່ເຂດຊົນນະບົດໃຫ້ມີໂອກາດ ເຂົ້າເຖິງການສຶກສາຢ່າງເທົ່າທຽມ ເປັນຕົ້ນແມ່ນ ການສະໜອງວັດຖຸ, ອຸປະກອນການຮຽນ ແລະການໃຫ້ທຶນການ ສຶກສາໃນສາຍພຣະສົງສາມະເນນ. ນອກຈາກນີ້ ກໍເພື່ອສ້າງແລະສົ່ງເສີມພຣະສົງສາມະເນນໃຫ້ມີຄວາມຮູ້, ຄວາມເຂົ້າໃຈໃນຫລັກສີລະທັມ ເພື່ອພັດທະນາຊຸມຊົນ, ສັງຄົມໃຫ້ມີຄວາມເຂັ້ມແຂງ ບໍ່ຫລົງໄຫລໃນສິ່ງງົມງວາຍ.

ມູນນິທິດັ່ງກ່າວນີ້ ແມ່ນອົງການຈັດຕັ້ງສັງຄົມທີ່ບໍ່ຫວັງຜົນກຳໄລ ແລະ ສາມາດເຄື່ອນໄຫວໃນຂອບເຂດ ທົ່ວປະເທດ ໂດຍມີສຳນັກງານຕັ້ງຢູ່ວັດຈອມທອງ ວະນາຣາມ, ບ້ານສວນມອນ, ເມືອສີສັດຕະນາກ.

70235999_104032754330473_6152353910636937216_n

ການສ້າງຕັ້ງມູນນິທິສົ່ງເສີມການສຶກສາສົງຄັ້ງນີ້ ຖືໄດ້ວ່າ ເປັນບາດກ້າວແລະໂສມໜ້າປະຫວັດສາດອັນ ໃໝ່ໃນປະເທດເຮົາ, ເປັນນິມິດໝາຍອັນດີໃຫ້ແກ່ວົງການສຶກສາສົງໃນລາວ ແລະອີກ ຢ່າງ ກໍເພື່ອ ເປັນການສືບທອດ ແລະສົ່ງເສີມພາລະກິດການສຶກສາສົງໃນລາວ ທີ່ມີປະຫວັດສາດມາຍາວນານ. ດັ່ງທີ່ເຮົາເຫັນໄດ້ຈາກປະຫວັດສາດໃນອະດີທີ່ຜ່ານມາ ເຊິ່ງການສຶກສາສົງລາວເຄີຍຈະເລີນ ຮຸ່ງເຮືອງທີ່ສຸດໃນ ອະດີດ, ເຄີຍມີປະຫວັດສາດກ່າວເຖິງຄວາມ ຈະເລີນເຂັ້ມແຂງຂອງການສຶກສາລາວມາຫລາຍຄັ້ງ, ແລະການສຶກສາ ກໍເປັນວຽກງານອັນສຳຄັນໃນທາງພຸດທະສາສນາ ເພື່ອໃຫ້ສອດຄ່ອງແທດເໝາະກັບຫລັກທັມຄຳສອນຂອງພຣະພຸດທະອົງທີ່ວ່າ ໜ້າທີ່ໃນພຸດທະສາສນາໃນມີ 2 ຢ່າງຄື: 1. ຄັນຖະທຸຣະ: ວຽກໃນການສຶກສາຮ່ຳຮຽນຕາມຫລັກທັມຄຳສອນຂອງພຣະພຸດທະສາສນາຫລືທາງໂລກ, 2. ວິປັດສະນາທຸຣະ: ວຽກທີ່ຈະຕ້ອງນຳເອົາຫລັກທັມຄຳສອນນັ້ນໄປປະຕິບັດໂຕຈິງ. ນອກຈາກນີ້ແລ້ວ ການສຶກສາຮ່ຳຮຽນກໍເປັນການຕໍ່ລົມຫາຍໃຈພຸດທະສາສນາໃຫ້ດຳລົງຢູ່ຍາວນານໄດ້. ສະນັ້ນ ການສ້າງຕັ້ງມູນນິທິສົ່ງເສີມການສຶກສາສົງ ຈິ່ງຈະເຮັດບົດບາດໜ້າທີ່ໃນການສົ່ງເສີມການສຶກສາທາງພຸດທະສາສນາ ເພື່ອໃຫ້ພຣະສົງສາມະເນນ ມີຄວາມຮູ້ ເພື່ອນຳໃຊ້ເຂົ້າໃນການປົກປັກຮັກສ້າງສາພັດທະນາປະເທດຊາດ ແລະພຣະພຸດທະສາສນາໃຫ້ຈະເລີນຮຸ່ງເຮືອງສືບໄປ.

70378643_104028990997516_3158706983146618880_n70331595_104032707663811_6007386132898119680_n70379099_104031780997237_5577697113317310464_n70709589_104030377664044_6769585705149530112_n

 

70706925_104030054330743_7455834497372651520_n70785517_104044550995960_7086113456151068672_n

ຂ່າວໂດຍ: ເອກັຄຄະຈິຕໂຕ ພິກຂຸ
ພາບ: ເພຈ ມູນນິທິສົ່ງເສີມການສຶກສາສົງ

Ekaggacitto Bhikkhu

Lao Buddhism is a website designed for Lao Buddhist Community.

Ekaggacitto Bhikkhu has 92 posts and counting. See all posts by Ekaggacitto Bhikkhu

This site uses Akismet to reduce spam. Learn how your comment data is processed.