ຄະນະທັມມະຍາຕຣາ ໕ ແຜ່ນດິນຜ່ານອຸດົມໄຊ

ຫລັງຈາກທີ່ໂຄງການທັມມະຍາຕຣາ ໕ ແຜ່ນດິນໄດ້ເລີ່ມຕົ້ນເດີນທາງແລະເປີດພິທີຂຶ້ນທີ່ວັດພຣະບາດຜາເງົາ, ອຳເພີຊຽງແສນ, ຈັງຫວັດຊຽງຮາຍ ເມື່ອວັນທີ ໑໕ ຕຸລາ ໒໕໖໒ ທີີຜ່ານມາ ແລ້ວໄດ້ເຄື່ອນເຂົ້າໄປພະມ້າໃນວັນທີ ໑໖ ຕອນເຊົ້າ ເຊິ່ງມີຊາວພຸດອອກມາໃສ່ບາດເກືອບສອງໝື່ນກວ່າຄົນໃນໄລຍະທາງເກືອບ ໕ ກິໂລແມັດ. ການເດີນທາງທັມມະຍາຕຣາໃນດິນແດນໄທແລະພະມ້າ ສ້າງຄວາມປະທັບໃຈ ແລະປຶ້ມປິຕິຍິນດີໃຫ້ຄະນະເດີນທາງຢ່າງຍິ່ງ ແລະເມື່ອຍາດໂຍມຊາວພຸດໄດ້ເຫັນພຣະສົງຈາກ ໕ ປະເທດໃນຈຳນວນ ໕໓ ອົງທີ່ຮ່ວມເດີນທາງພ້ອມດ້ວຍຄະນະຍາດໂຍມຕິດຕາມ ໑໐໐ ກວ່າຄົນ ກໍເກີດມີຄວາມປະທັບໃຈແລະໄດ້ຕ້ອນຮັບຢ່າງອົບອຸ່ນລົ້ນເຫລືອ. ແລະໃນຕອນເຊົ້າຂອງວັນທີ ໑໙ ກໍໄດ້ອອກເດີນທາງຈາກພະມ້າ ມຸ້ງໜ້າສູ່ອຳເພີຊຽງຂອງ, ຈັງຫວັດຊຽງຮາຍ ເພື່ອຢ້ຽມຊົມວັດພຣະແກ້ວ ແລະປູກຕົ້ນສີມະຫາໂພ ຈາກນັ້ນກໍໄດ້ເດີນທາງມຸ້ງໜ້າສູ່ແຂວງອຸດົມໄຊ.

ທີ່ແຂວງອຸດົມໄຊ ຄະນະເດີນທາງໄດ້ມາຮອດວັດພູທາດ, ເມືອງໄຊ, ແຂວງອຸດົມໄຊໃນຕອນແລງ ໄດ້ມີພິທີການຕອນຮັບຈາກພໍ່ແມ່ປະຊາຊົນ, ຄູບາອາຈານແລະການນຳພັກລັດຢ່າງອົບອຸ່ນ ແລະຕະຫລອດການເດີນທາງນັບແຕ່ດ່ານກໍໄດ້ມີການຕ້ອນຮັບຈາກພໍ່ແມ່ປະຊາຊົນ ພະນັກງານ,ນັກຮຽນນັກສຶກສາຢ່າງປະທັບໃຈ,ພ້ອມທັງມີຂະບວນຕ້ອນຮັບໃນແຕ່ລະຈຸດຢືນໂບກມືຕ້ອນຮັບຢ່າງດ້ວຍຄວາມຍິນດີ.

ໃນພິທີຕ້ອນຮັບໃນຕອນແລງຂອງວັນທີ ໑໙ ທີ່ວັດພູທາດໄຊມຸງຄຸນ ຕາງໜ້າໃຫ້ອົງການພຸດທະສາສະໜາສຳພັນລາວຂັ້ນແຂວງ ນຳໂດຍ ພຣະອາຈານໃຫຍ່ ສົມຈິດ ເພັງສະຫວັນ, ຄະນະ ອພສ ແຂວງອຸດົມໄຊ ໄດ້ກ່າວການຕ້ອນຮັບ, ແລະຕາງໜ້າການນຳພັກລັດມີທ່ານໂອວາດ ຈັນທະວົງ,ປະທານແນວລາວສ້າງຊາດແຂວງ ກໍໄດ້ກາາວຕ້ອນຮັບຄະນະ, ພ້ອມນີ້ຍັງມີທ່ານ ຄຳພຽງ ຢາຈົງວາ, ຮອງເຈົ່າແຂວງອຸດົມໄຊ ກໍໄດ້ເຂົ້າຮ່ວມ.

ໃນນັ້ນ ຕອນເຊົ້າຂອງວັນທີ ໒໐ ຄະນະພຣະສົງທັມມະຍາຕຣາ ໕ ແຜ່ນດິນ ກໍໄດ້ຮັບບິນທະບາດຈາກພໍ່ແມ່ປະຊາຊົນຍາດໂຍມຊາວແຂວງອຸດົມໄຊ ເລີ່ມຈຸດບິນທະບາດຈາກໜ້າຫ້ອງວ່າການແຂວງອຸດົມໄຊ ໄປເຖິງໂຮງແຮມມິດຕະພາບ. ປະຊາຊົນຊາວແຂວງອຸດົມໄຊໄດ້ອອກມາໃສ່ບາດຢ່າງເປັນລະບຽບຮຽບຮ້ອຍດ້ວຍການນຸ່ງຖືແບບປະເພນີລາວ,ນັ່ງໃສ່ບາດດ້ວຍຄວາມຈົບງາມ ອັນເປັນພາບທີ່ໜ້າປະທັບໃຈໃຫ້ແກ່ຜູ້ພົບເຫັນ ໂດຍສະເພາະແມ່ນຄະນະຮ່ວມເດີນທາງທັມມະຍາຕຣາໃນຄັ້ງນີ້.

ຫລັງຈາກທີ່ຄະນະທັມມະຍາຕຣາ ໕ ແຜ່ນດິນໄດຮັບບິນທະບາດແລະສັນເຂົ້າເຊົ້າແລ້ວ ກໍໄດ້ອອກເດີນທາງມຸ້ງໜ້າສູ່ຊາຍແດນຫວຽດນາມ ເພື່ອເຂົ້າສູ່ດຽນບຽນຟູໃນຕອນແລງ.

ຂ່າວໂດຍ: ເອກັຄຄະຈິຕໂຕ ພິກຂຸ

ພາບໂດຍ:ທີມຂ່າວທັມມະຍາຕຣາ ໕ ແຜ່ນດິນ

Ekaggacitto Bhikkhu

Lao Buddhism is a website designed for Lao Buddhist Community.

Ekaggacitto Bhikkhu has 92 posts and counting. See all posts by Ekaggacitto Bhikkhu

This site uses Akismet to reduce spam. Learn how your comment data is processed.