ການໃສ່ບາດຄັ້ງໃຫຍ່ທີີ່ທາດຫລວງ ແກ່ພຣະສົງທັມມະຍາຕຣາ ໕ ແຜ່ນດິນ

ໃນຕອນແລງຂອງວັນທີ ໒໕ ຕຸລາ ໒໐໑໙ ນີ້ ຂະບວນທັມມະຍາຕຣາ ໕ ແຜ່ນດິນ ໄດ້ເດີນທາງມາເຖິງນະຄອນຫລວງວຽງຈັນຢ່າງສະຫວັດດີພາບແລະໄດ້ຮ່ວມພິທີໃສ່ບາດແລະປູກຕົ້ນສີມະຫາໂພທີ່ວັດພຣະທາດຫລວງເໜືອໃນຕອນເຊົ້າຂອງວັນທີ ໒໖ ຕຸລາ ໒໐໑໙.

ເປັນປະທານໃນພິທີຕັກບາດຖວາຍສັງຄະທານມີ ພຣະອາຈານໃຫຍ່ ມະຫາງອນ ດຳລົງບຸນ, ປະທານສູນກາງອົງການພຸດທະສາສນາສຳພັນລາວ, ພະນະທ່ານ ປອ.ໄຊສົມພອນ ພົມວິຫານ, ກົມການເມືອງສູນກາງພັກ, ປະທານແນວລາວສ້າງຊາດ ພ້ອມດ້ວຍຄອບຄົວການນຳພັກລັດ.

ໃນພິທີ ທ່ານ ປອ.ສຸພະໄຊ ວິຣະພູຊົງ, ເລຂາທິການສະຖາບັນໂພທິຄະຍາວິຊາໄລໄດ້ຂຶ້ນກ່າວລາຍງານກ່ຽວກັບໂຄງການຂະບວນທັມມະຍາຕຣາ ໄດ້ກ່ຽວເຖີງທີ່ມາຂອງກອງປະຊຸມວ່າ: ໂຄງການດັ່ງກ່າວເກີດຂຶ້ນໄດ້ດ້ວຍການສານຕໍ່ປະນິທານຂອງພຣະອາຈານໃຫຍ່ ມະຫາຜ່ອງ ສະມາເລີກ, ອະດີດປະທານສົງລາວອົງທີ ໔ ທີ່ໄດ້ຝາກຄວາມຫວັງໄວ້ໃນຄັ້ງທີ່ໄດ້ຮ່ວມປະຊຸມຫລ້າສຸດທີ່ສຽມຣຽບ ປະເທດກຳປູເຈຍ ໃນຫົວຂໍ້ ພຸດພິກສຸວັນນະພູມ ເຊິ່ງໝາຍຄວາມວ່າ ການສັນຕິພາບແລະຄວາມສາມັກຄີປອງດອງຂຶ້ນເກີດຂຶ້ນໃນບັນດາປະເທດທີ່ນັບຖືພຸດທະສາສນາໃນເຂດລຸ່ມແມ່ນຳ້ຂອງ ໃຫ້ລວມກັນເປັນໜຶ່ງດຽວ ເພື່ອສືບສານພຣະພຸດທະສາສນາໃຫ້ຈະເລີນຮຸ່ງເຮືອງສືບໄປຈົນສິ້ນພຸດທັນດອນຄື ໕໐໐໐ ພຣະວັດສາ ໂດຍໃຫ້ຖືວ່າ ພວກເຮົາເປັນຊາວພຸດ ເປັນລູກຂອງພໍ່ອົງດຽວກັນ ຄື ພຣະສັມມາສັມພຸດທະເຈົ້າ ແລະມີແມ່ດຽວກັນຄື ສາຍແມ່ນຳ້ຂອງ ແລະເຂດເປັນຂົງເຂດທີ່ເປັນດິນແດນສະວັນນະພູມ ທີ່ພຣະໂສນະ ແລະພຣະອຸດຕະຣະ ອໍຣະຫັນຕະເຖຣະເຈົ້າ ໄດ້ນຳເອົາພຣະພຸດທະສາສນາມາເຜີຍແຜ່ໃນດິນແດນແຫ່ງນີ້ ໃນສະໄໝພຣະເຈົ້າອະໂສກມະຫາຣາຊ. ສະນັ້ນ, ການເດີນທາງທັມມະຍາຕຣາ ແມ່ນເພື່ອເປັນການຮັດແໜ້ນຄວາມສຳພັນອັນດີງາມຂອງບັນດາປະເທດທີີນັບຖືພຣະພຸດທະສາສນາໃນຂົງເຂດນີ້ ແລະເພື່ອເປັນການສານຕໍ່ແລະຕາມຮອຍພຣະອະຣິຍະເຈົ້າແລະສືບຕໍ່ພາລະກິດການເຜີຍພຣະພຸດທະສາສນາໃຫ້ຈະເລີນຮຸ່ງເຮືອງສືບໄປ.

ບັນຍາກາດແຫ່ງການໃສ່ບາດແກ່ພຣະສົງທີ່ເປັນຕົວແທນຈາກຊາວພຸດ ໕ ປະເທດໃນໂຄງການທັມມະຍາຕຣາ ໕ ແຜ່ນດິນພ້ອມດ້ວຍພຣະສົງທ້ອງຖິ່ນລວມທັງໝົດ ໓໐໐ ກວ່າອົງໃນຄັ້ງນີ້ ມີພໍ່ແມ່ປະຊາຊົນປະມານຫລາຍກວ່າ ໓໐,໐໐໐ ຄົນອອກມາໃສ່ບາດຢ່າງລົດເຫລືອເປັນຄັ້ງປະຫວັດສາດຢ່າງໜ້າຊື່ນຊົມອະນຸໂມທະນາຢ່າງຍິ່ງ, ບາງຄົນກໍອອກມາລໍຖ້າແຕ່ເດິກໆ ການໃສ່ບາດກໍໄດ້ດຳເນີນໄປບໍ່ຕຳ່ກວ່າສາມຊົ່ວໂມງ ແຕ່ປະຊາຊົນກໍອົດທົນລໍຖ້າຢ່າງໃຈຈົດໃຈຈໍ່.

ຖືໄດ້ວ່າ ການຈັດພິທີຕ້ອນຮັບໃນການໃສ່ບາດຄັ້ງນີ້ໄດ້ຮັບຄວາມເອົາໃຈໃສ່ຢ່າງຕັ້ງໜ້າຈາກຄະນະການນຳພັກລັດ ປະສົມປະສານກັບອົງການພຸດທະສາສນາສຳພັນລາວແລະອົງການຈັດຕັ້ງທີ່ກ່ຽວຂ້ອງເປັນຢ່າງດີ ຈິ່ງເຮັດໃຫ້ງານບຸນຄັ້ງນີ້ ປະສົບຜົນສຳເລັດຢ່າງສວຍງາມ. ເຖິງຢ່າງໃດກໍຕາມ, ຖ້າມີການຈັດງານແບບນີ້ອີກ ຂໍໃຫ້ມີການຈັດພິທີແຕ່ເດິກໆແລະປະຢັດເວລາໃຫ້ກະທັດຮັດລົງອີກກວ່າເກົ່າ ເພື່ອຈະບໍ່ໃຫ້ພໍ່ແມ່ປະຊາຊົນລໍຖ້າດົນທ່າມກາງແສງແດດທີ່ຮ້ອນໄໝ້.

ຂ່າວ: ເອກັກຄະຈິດໂຕ ພິກຂະ
ພາບ: Ball Phatcharapong

This site uses Akismet to reduce spam. Learn how your comment data is processed.