ທັມມະຍາຕຣາ ໕ ແຜ່ນດິນປິດໂຄງການທີ່ສຽມຣຽບ

ຫລັງຈາກທີ່ໄດ້ດຳເນີນໂຄງການທັມມະຍາຕຣາມານັບແຕ່ວັນທີ ໑໕ ຕຸລາ ເຊິ່ງເປີດຂຶ້ນທີ່ວັດພຣະບາດຜາເງົາ,ອຳເພີຊຽງແສນ, ຈັງຫວັດຊຽງຮາຍ ຈົນມາເຖິງວັນທີ ໓໐ ຕຸລາ ໒໐໑໙ ກໍຖືໄດ້ວ່າເປັນເວລາ ໑໘ ວັນ ບົນເສັ້ນທາງເກືອບ ໒໐໐໐ ກວ່າກິໂລແມັດ , ຂະບວນທັມມະຍາຕຣາ ໕ ແຜ່ນດິນໄດ້ດຳເສີນກິດຈະກຳເປັນມື້ສຸດທ້າຍໃນປະເທດຂະເໝນ. ໃນຕອນເຊົ້າໄດ້ມີພິທີປູກຕົ້ນພຣະສີມະຫາໂພທີ່ວັດເທບໂພທິວົງ. ເປັນປະເທດໃນພິທີໂດຍສົມເດັດເທບວົງ, ສົມເດັດພຣະສັງຄະຣາຊແຫ່ງຣາຊະອານາຈັກກຳປູເຈຍ.

ດຣ.ສຸພະໄຊ ວີຣະພຸຊົງ ຂາບຖວາຍຄວາມເຄົາຣົບສົມເດັດອັກຄະມະຫາສັງຄະຣາຊາທິບໍດີ ເທບວົງ

ພ້ອມດ້ວຍຜູ້ນຳພຣະສົງຈາກ ໕ ປະເທດ ເຊັ່ນ: ຫລວງພໍ່ພຣະທັມວໍຣະນາຍົກ, ປະທານທີ່ປຶກສາສະຖາບັນໂພທິຄະຍາວິຊາໄລ, ພຣະອາຈາຣຍ໌ໃຫຍ່ ຕິດ ທ່ຽນ ຕັ໋ມ, ປະທານສົງຝ່າຍເຖຣະວາດປະເທດຫວຽດນາມ, ພຣະອາຈາຣຍ໌ດາວເຮືອງ ຄຳປະເສີດ, ຄະນະປະຈຳສູນກາງ ອພສ, ຫົວໜ້າຫ້ອງການສາທາລະນູປະການ, ພຣະອາຈາຣຍ໌ພັດທັນຕະ ກຸມາຣະ, ອະທິການບໍດີມະຫາວິທະຍາໄລປະຣິຍັດສາສນາ ສະຫະພາບພະມ້າ.

ສົມເດັດອັກຄະມະຫາສັງຄະຣາຊາທິບໍດີ ເທບວົງ, ສົມເດັດພຣະສັງຄະຣາຊແຫ່ງຣາຊະນາຈັກກຳປູເຈຍ ຂຶ້ນກ່າວໃນພິທີປິດໂຄງການ

ພ້ອມນີ້ ກໍຍັງມີປະທານຝ່າຍຄາຣະວາດໂດຍສົມເດັດພິໄຊ ເສນາ ເຕຍບັນ, ຮອງນາຍົກລັກຖະມົນຕີ, ລັດຖະມົນຕີກະຊວງກະລາໂຫມແຫ່ງຣາຊະອານາຈັກກໍາປູເຈຍ, ທ່ານ ສາດສະດາຈານ ປອ.ສົມອົກ ກິ່ງສະດາ, ຮອງປະທານແນວລາວສ້າງຊາດ ກໍໄດ້ໃຫ້ກຽດເຂົ້າຮ່ວມ.

ສົມເດັດ ພິໄຊ ເສນາ ເຕຍບັນ, ຮອງນາຍົກລັດຖະມົນຕີ, ລັດຖະມົນຕີກະຊວງກະລາໂຫມ,ຂຶ້ນກ່າວສູນທອນພົດໃນພິທີປິດ
ດຣ.ສຸພະໄຊ ວີຣະພຸຊົງ,ຫົວໜ້າໂຄງການທັມມະຍາຕຣາ ໕ ແຜ່ນດິນ, ເລຂາທິການສະຖາບັນໂພທິຄະຍາວິຊາໄລ ກ່າວລາຍງານປິດປະຊຸມ
ພິທີປິດໂຄງການທີ່ໂຮງແຮມໂຊຟີເທລ
ປະມຸກສົງແລະພຣະມະຫາເຖຣະຈາກແຕ່ລະປະເທດເຂົ້າຮ່ວມ

ຫລັງຈາກສຳເລັດພິທີການປູກຕົ້ນພຣະສີມະຫາໂພແລ້ວ ກໍໄດ້ມີການເດີນຂະບວນທັມມະຍາຕຣາ ໕ ແຜ່ນດິນຈາກໂຮງແຮມໂຊຟິເທລໄປປະມານໜຶ່ງກິໂລ ກ່ອນຈະເຖິງສະຖານທີ່ຮັບບິນທະບວດ. ບັນຍາກາດການຮັບບິນທະບາດທີ່ຫໍພຣະພຸດທະຮູບຄູ່ບ້ານຄູ່ເມືອງໜ່ຽງເຈກໜ່ຽງໂຈມ ໂດຍມີການນຳຂັ້ນສູງນຳໂດຍສົມເດັດພິໄຊ ເສນາ ເຕຍບັນ ເປັນປະທານໃນການໃສ່ບາດ.

ຈາກນັ້ນຕອນບ່າຍໄດ້ມີພິທີປິດໂຄງການທີ່ໂຮງແຮມໂຊຟີເທລ, ໃນພິທີປິດທ່ານ ດຣ.ສຸພະໄຊ ວີຣະພູຊົງ, ຜູ້ອຸປະຖຳແລະເປັນຫົວໜ້າໂຄງການທັມມະຍາຕຣາ ໕ ແຜ່ນດິນ ເລຂາທິການສະຖາບັນໂພທິຄະຍາວິຊາໄລ ໄດ້ຂຶ້ນກ່າວລາຍງານຄວາມເປັນມາ ແລະຜົນສຳເລັດຂອງການດຳເນີນໂຄງການທັມມະຍາຕຣາ ໕ ແຜ່ນດິນ ໂດຍໄດ້ຮັບຮັບບັນດານໃຈ,ການຈຸດປະກາຍ ແລະປະນິທານຂອງນາທ່ານໃຫຍ່ ມະຫາຜ່ອງ ສະມາເລີກ, ອະດີດປະທານສູນກາງ ອພສ ທີ່ໄດ້ກ່າວໄວ້ໃນກອງປະຊຸມພຸດທະສາສນາໃນຫົວຂໍ້“ພຸດພິກສຸວັນນະພູມ” ທີ່ໄດ້ຈັດຂຶ້ນທີ່ສຽມຣຽມໃນປີ ພ.ສ.໒໕໕໘ ກ່ອນທີ່ຈະມໍຣະນະພາບວ່າ: ການເຂົ້າເຖິງຄວາມເປັນໂສດາບັນແມ່ນບໍ່ຍາກ ພຽງແຕ່ລະສັງໂຍດ ໓ ໄດ້ ກໍສາທາດເຂົ້າເຖິງໄດ້ ແລະຍາທ່ານໃຫຍ່ຍັງໄດ້ຝາກຄວາມຫວັງແລະປະນິທານເອົາໄວ້ວ່າ ຢາກໃຫ້ດິນແດນສຸວັນນະພູມ ຫລືປະເທດເຂດລຸ່ມແມ່ນ້ຳຂອງທີ່ນັບຖືພຸດທະສາສນາໃຫ້ກັບມາມີຄວາມສາມັກຄີ ຈະເລີນຮຸ່ງເຮືອງແລະສັນຕິສຸກດ້ວຍຫລັກທັມໃນທາງພຣະພຸດທະສາສນາເນື່ອງຈາກວ່າພວກເຮົາຊາວພຸດມີພໍ່ຄົນດຽວກັນຄືອົງສົມເດັດພຣະສຳມາສຳພຸດທະເຈົ້າ ແລະມີແມ່ດຽວກັນຄື ແມ່ນຳ້ຂອງ. ສະນັ້ນ, ພວກເຮົາຈິ່ງຄວນສືບຕໍ່ດຳເນີນໂຄງການນີ້ໄປໃນອະນາຄົດພາຍພາກໜ້າເພື່ອປົກປັກຮັກສາພຣະພຸດທະສາສນາໃຫ້ຈະເລີນຮຸ່ງເຮືອງໃນດິນແດນນີ້ຈົນກວ່າເຖິງສອງພັນຫ້າຮ້ອຍປີສິ້ນພຸດທະສາສນາຂອງພຣະມະຫາສະມະນະໂຄດົມ.

ພິທີປູກຕົ້ນພຣະສີມະຫາໂພທີ່ນຳຈາກອິນເດຍ ໄວ້ໃນວັດເທບໂພທິວົງ, ສຽມຣຽບ.

ນອກຈາກນີ້, ສົມເດັດອັກຄະມະຫາທິບໍດີ ເທບວົງ, ສົມເດັດພຣະສັງຄະຣາຊແຫ່ງຣາຊະນາຈັກກຳປູເຈຍ ຍັງໄດ້ເມດຕາຂຶ້ນກ່າວສຳໂມທະນີຍະກະຖານ ໄດ້ຍົກເອົາຫລັກພຣົມມະວິຫາຣະທັມ ຄື ເມດຕາ, ກະຣຸນາ, ມຸທິຕາ ແລະອຸເປກຂາແລະຫລັກອະຣິຍະສັດ ໔ ເພື່ອໃຫ້ມາປະຕິບັດໃນຊີວິດປະຈຳວັນ ເພື່ອໃຫ້ເກີດຄວາມຜາສຸກຮົ່ມເຢັນໃນສັງຄົມ. ພ້ອມນີ້, ສົມເດັດ ພິໄຊ ເສນາ ຍັງໄດ້ຂຶ້ນກ່າວຢ້ຳໃຫ້ຊາວພຸດປະຕິບັດຕາມຄຳສອນຂອງພຣະພຸດທະເຈົ້າໂດຍໃຫ້ນຳໃຊ້ຫລັກສິນຫ້າແລະປະພຶດປະຕິບັດທັມເພື່ອໃຫ້ເກີດຄວາມຈະເລີນໃນຊີວິດ, ໃຫ້ລະຊົ່ວທຳດີ ສ້າງຄວາມສາມັກຄີເພື່ອໃຫ້ເກີດສັນຕິພາບແລະຄວາມຜາສຸກໃນບັນດາປະເທດລຸ່ມແມ່ນຳ້ໂຂງຂອງພວກເຮົາ.

ພິທີບວງສວງອຸທິດສ່ວນກຸສົນຫາອະດີດຣາຊາທຸກພຣະອົງຂອງຣາຊະນາຈັກກຳປູເຈຍ

—–
ຂ່າວ: ເອກັຄຄະຈິຕຕາ ພິກຂຸ
ພາບ:ສົງກຣານ ເມືອງປຣະທັບ

Advertisements

Ekaggacitto Bhikkhu

Lao Buddhism is a website designed for Lao Buddhist Community.

Ekaggacitto Bhikkhu has 98 posts and counting. See all posts by Ekaggacitto Bhikkhu

This site uses Akismet to reduce spam. Learn how your comment data is processed.